چین کھپت اور شہریوں کی آمدنی میں اضافہ کرے گا

بیجنگ (شِنہوا) چین کی اعلیٰ مقننہ میں غور کے لئے  پیش کی گئی حکومتی کارکردگی رپورٹ کے مطابق ملک کھپت میں فعال طور پر اضافہ کرے گا اور شہری و دیہی رہائشیوں کی آمدنی بڑھانے کے منصوبے پر عملدرآمد کرے گا۔

رپورٹ کے مطابق ملک کھپت کو فروغ دینے کے لئے خصوصی اقدامات کو آگے بڑھائے گا جبکہ 2026 میں کم آمدنی والے طبقات کی آمدنی بڑھانے، جائیداد سے حاصل ہونے والی آمدنی میں اضافہ کرنے اور اجرتوں و سماجی تحفظ کے نظام کو بہتر بنانے کے لئے متعدد عملی اقدامات متعارف کرائے جائیں گے۔

چین کے دارالحکومت بیجنگ کے عظیم عوامی ہال میں 14 ویں قومی عوامی کانگریس (این پی سی) کے چوتھے سیشن کے افتتاحی اجلاس میں ارکان شریک ہیں۔(شِنہوا)

اشیائے صرف  کے تبادلہ پروگراموں کے لئے 250 ارب یوآن (36.17 ارب امریکی ڈالر) مالیت کے انتہائی طویل مدتی خصوصی مالیاتی بانڈز مختص کئے جائیں گے جبکہ اندرونی طلب میں اضافے کو سہولت دینے کے لئے مالیاتی تعاون کا 100 ارب یوآن کا خصوصی فنڈ قائم کیا جائے گا۔

جمعرات کو پیش کئے گئے 15 ویں پانچ سالہ منصوبے (2026-2030) کے مجوزہ مسودے کے مطابق چین کا ہدف ہے کہ 2026 سے 2030 کے عرصے میں مجموعی قومی پیداوار (جی ڈی پی) میں مقامی کھپت کے حصے میں نمایاں اضافہ کیا جائے تاکہ اندرونی طلب معیشت کی زیادہ اہم محرک بن سکے۔

مجوزہ مسودے میں کہا گیا ہے کہ چین ڈیجیٹل معیشت، ماحول دوست معیشت اور سمندری معیشت میں روزگار کے نئے مواقع تلاش کرے گا، رئیل اسٹیٹ کے شعبے اور سٹاک مارکیٹ کی صحت مند ترقی کو فروغ دے گا اور خدمات کے شعبے میں کھپت کی صلاحیت کو مزید اجاگر کرے گا۔