ٹوکیو (شِنہوا) جاپان کے شہر اوساکا میں چینی قونصل خانے نے جمعرات کو بتایا کہ اوساکا کی ایک شاہراہ پر چینی شہری کو لوٹ لیا گیا ہے۔ قونصل خانے نے حالیہ دنوں میں امن و امان کی صورتحال خراب ہونے کے پیش نظر اپنے شہریوں کو فی الحال جاپان کا سفر نہ کرنے کی تاکید کی ہے۔
قونصل خانے کے مطابق یہ واقعہ بدھ کے روز اوساکا شہر کے سومی یوشی وارڈ میں پیش آیا، جہاں ایک نامعلوم حملہ آور نے متاثرہ شخص پر حملہ کیا اور اس کا بیگ چھین لیا جس میں 50 لاکھ ین (تقریباً 32 ہزار 100 امریکی ڈالر) کی نقدی تھی۔ ملزم تاحال روپوش ہے۔
قونصل خانے نے کہا کہ اس نے مقامی پولیس کو فوری طور پر شکایت درج کرائی اور جاپانی حکام سے مطالبہ کیا کہ اس کیس کو جلد از جلد حل کیا جائے اور جاپان میں موجود چینی شہریوں کی جان اور مال کے تحفظ کو موثر بنایا جائے۔
حالیہ دنوں میں اسی نوعیت کے متعدد واقعات کا حوالہ دیتے ہوئے قونصل خانے نے اپنے قونصلر دائرہ کار میں موجود چینی شہریوں کو ہدایت کی کہ وہ مقامی سکیورٹی صورتحال پر گہری نظر رکھیں، زیادہ محتاط رہیں اور باہر جاتے وقت بڑی رقم نقد ساتھ لے کر نہ چلیں۔
ہنگامی صورت حال میں قونصل خانے نے شہریوں کو مشورہ دیا کہ وہ فوری طور پر پولیس کو اطلاع دیں اور مدد کے لئے اوساکا میں قائم چینی قونصل خانے سے رابطہ کریں۔
