اسلام آباد: نائب وزیراعظم اسحاق ڈار نے سمندری ترقی کیلئے عالمی شراکت داری ضروری قرار دیتے ہوئے کہا ہے کہ میری ٹائم انڈسٹری میں سرمایہ کاری کرنے والوں کی حوصلہ افزائی کی جائیگی، پائیدار ترقی کیلئے عالمی بحری امور کی تنظیم کے ساتھ مل کر کام جاری رکھیں گے،شپ بریکنگ انڈسٹری کو جدید تقاضوں سے ہم آہنگ کیا جائے گا،پاکستان کا مقصد علاقائی ترسیل کا مرکز بننا ہے، مستقبل میں ملکی بندرگاہوں کے شعبے میں ترقی دیکھنے کو ملے گی۔
تفصیلات کے مطابق اسلام آباد میں بلیو اکانومی بارے منعقدہ کانفرنس سے خطاب کرتے ہوئے نائب وزیراعظم اسحاق ڈار نے کہا کہ پاکستان کی بحری امور کی صنعت میں سرمایہ کاری کے مواقع موجود ہیں،پاکستان کی اقتصادی ترقی کو آگے بڑھانے کیلئے بلیو اکانومی نا گزیر ہے۔
انہوں نے کہا کہ سمندری ترقی کیلئے عالمی شراکت داری ضروری ہے، بحری امور میں جدید رجحانات کو فروغ دینے کی ضرورت ہے، ملکی وعالمی سرمایہ کاروں کیلئے آسانیاں پیدا کررہے ہیں، شپ بریکنگ انڈسٹری کو جدید ٹیکنالوجی سے مزین کیا جائے گا۔ انہوں نے کہا کہ حکومت ماہی گیری کے شعبے کو جدید تقاضوں سے ہم آہنگ کرنے کیلئے اقدامات کر رہی ہے،ایس آئی ایف سی کے تحت ماہی گیری شعبے کو خاص اہمیت حاصل ہے۔
انہوں نے کہا کہ ماہی گیری کیلئے بیچ اور خوراک کا درست طریقہ کار کے تحت انتظام ضروری ہے۔ انہوں نے کہا کہ پاکستان کا مقصد علاقائی ترسیل کا مرکز بننا ہے، مستقبل میں پاکستان کی بندرگاہوں کے شعبے میں ترقی دیکھنے کو ملے گی۔
انہوں نے کہا کہ میری ٹائم انڈسٹری سے متعلق سب کے مفاد مشترک ہیں،انڈسٹری کی ڈی کاربنائزیشن جاری ہے۔ انہوں نے کہا کہ بلیو اکانومی کے ذریعے روزگار کی تخلیق اور معاشی استحکام آئے گا، پائیدار ترقی کیلئے عالمی بحری امور کی تنظیم کے ساتھ مل کر کام جاری رکھیں گے،میری ٹائم انڈسٹری میں سرمایہ کاری کرنے والوں کی حوصلہ افزائی کریں گے۔
