ٹرمپ "امن بورڈ” کو اقوام متحدہ کا متبادل بنانا چاہتے ہیں،فلسطینی حکام

رملہ (شِنہوا) فلسطینی حکام نے بتایا ہے کہ امریکی صدر ڈونلڈ ٹرمپ اقوام متحدہ کے متبادل کے طور پر نام نہاد "امن بورڈ” قائم کرنا چاہتے ہیں۔

فتح کی مرکزی کمیٹی کے نائب سیکرٹری جنرل صابری سیدام نے صحافیوں سے کہا کہ بورڈ کا مقصد ابھی واضح نہیں ہے اور اس میں فلسطینی شامل نہیں ہیں۔

صابری سیدام نے کہا کہ فلسطینی فریق اس بات سے خوفزدہ ہے کہ ٹرمپ ایسے منصوبے جاری رکھنے کے لئے پرعزم ہیں جو فلسطینیوں کو نظرانداز کرتے ہیں، ان کے حقوق ختم کرتے ہیں اور بے دخلی کو فروغ دیتے ہیں۔

ادھر فلسطینی نائب وزیر خارجہ برائے سیاسی اور قانونی امور عمر عواض اللہ نے بین الاقوامی اداروں کی حمایت اور خطے میں امن، سلامتی اور استحکام کو فروغ دینے کی اہمیت پر زور دیا جس کا مقصد فلسطینی ریاست کے قیام کو یقینی بنانا ہے۔

وائس آف فلسطین ریڈیو سٹیشن سے بات کرتے ہوئے عواض اللہ نے کہا کہ کسی بھی نئی قائم شدہ کونسل کو جائز فلسطینی اداروں کی جگہ نہیں لینی چاہیے اور فلسطینی استحکام، غزہ کی پٹی میں جنگ کا خاتمہ اور قتل و تباہی کے رکنے کے خواہاں ہیں تاکہ غزہ دوبارہ سنبھل سکے اور تعمیر ہو۔

ٹرمپ نے باضابطہ طور پر نام نہاد ” امن بورڈ” کو 22 جنوری کو سوئٹزر لینڈ کے شہر ڈیووس میں عالمی اقتصادی فورم کے دوران منشور پر دستخط کی تقریب میں متعارف کرایا ۔ بعض بڑی عالمی طاقتوں اور امریکہ کے روایتی اتحادیوں نے بورڈ میں شمولیت سے انکار کر دیا ہے۔