بیجنگ (شِنہوا) چین کی وزارت عوامی تحفظ نے بتایا کہ چینی پولیس غیر قانونی کاروباری سرگرمیوں میں ملوث ہونے کے شبہ میں چھن نامی ایک شخص کو جنوبی افریقہ سے ملک واپس لے آئی ہے۔
یہ کارروائی دونوں ممالک کے درمیان حوالگی کے معاہدے پر عملدرآمد کے بعد سے اب تک کی پہلی کامیاب حوالگی ہے۔
تفتیش کاروں کے مطابق چھن پر الزام ہے کہ اس نے غیر قانونی منافع کے لئے کرنسی کے تبادلے کا غیر مجاز کاروبار چلایا۔اس غیر قانونی کاروبار کی رقم 4 کروڑ 90 لاکھ یوآن (تقریباً 70 لاکھ امریکی ڈالر) سے زائد تھی۔ جون 2020 میں شنگھائی کی ایک پراسیکیوشن اتھارٹی نے غیر قانونی کاروباری سرگرمیوں کے شبے میں اس کی گرفتاری کی منظوری دی۔ جولائی 2025 میں اسے جنوبی افریقہ کی پولیس نے گرفتار کیا، جس کے بعد چین نے اس کی حوالگی کی درخواست جمع کرائی۔ دسمبر 2025 میں جنوبی افریقہ کی ایک عدالت نے چھن کو چین کے حوالے کرنے کا حکم جاری کیا۔
وزارت عوامی تحفظ کا کہنا ہے کہ یہ کامیاب حوالگی جرائم کے خلاف مشترکہ جنگ میں دونوں ممالک کے پختہ عزم کی عکاسی کرتی ہے اور اسے دوطرفہ عدالتی اور قانون نافذ کرنے والے تعاون کو مضبوط بنانے میں ایک سنگ میل قرار دیا ہے۔
