اسلام آباد ہائیکورٹ نے خصوصی عدالتوں، ٹریبیونلز اور لاء افسران کے جوڈیشل الائونسز کی ادائیگی روکنے کے احکامات معطل کرتے ہوئے وفاق، وزارت خزانہ، کنٹرولر جنرل اکائونٹس اور اکائونٹنٹ جنرل پاکستان کو نوٹس جاری کرتے ہوئے 2 ہفتوں میں جواب طلب کرلیا۔
بدھ کو اسلام آباد ہائیکورٹ کے جسٹس ارباب محمد طاہر نے ملازمین کی درخواست پر سماعت کا تحریری حکم نامہ جاری کرتے ہوئے کہا کہ درخواست گزار وکیل کے مطابق وزارت خزانہ اور اکائونٹنٹ جنرل آفس نے ملازمین کے الائونسز روک دیے ہیں، وکیل کے مطابق لاہور ہائیکورٹ کے ملتان اور بہاولپور بینچز نے احکامات پہلے ہی معطل کر رکھے ہیں۔
عدالت نے قرار دیا کہ 5 اور 15 ستمبر 2025 کے اکائونٹنٹ جنرل آفس اور وزارت خزانہ کے احکامات معطل کئے جاتے ہیں۔
اسلام آباد ہائیکورٹ نے وفاق اور وزارت خزانہ، کنٹرولر جنرل اکائونٹس اور اکائونٹنٹ جنرل پاکستان کو نوٹس جاری کرتے ہوئے 2ہفتوں میں پیراوائز کمنٹس جمع کرانے کی ہدایت کرتے ہوئے سماعت 9فروری تک ملتوی کردی۔
