اسلام آباد: ایف آئی اے اینٹی کرپشن اسلام آباد نے گزشتہ 8 ماہ کے دوران مختلف کارروائیوں میں 16 کروڑ روپے سے زائد کی ریکوری کرلی۔ تفصیلات کے مطابق ایف آئی اے اینٹی کرپشن اسلام آباد سرکل نے گزشتہ 8 ماہ کی کارکردگی رپورٹ جاری کردی۔
رپورٹ کے مطابق گزشتہ 8 ماہ کے دوران 104 مقدمات درج کر کے 270 انکوائریوں کی تفتیش مکمل کی گئی اس دوران مختلف مقدمات میں 16 کروڑ روپے سے زائد رقم کی ریکوری کی گئی ہے۔رپورٹ کے مطابق سپریم کورٹ کے حکم کے مطابق متروکہ وقف املاک کے 1550 کنال کے کمرشل و رہائشی رقبے واگزار کروائے گئے، واگزار کرائی گئی کمرشل و رہائشی زمین کی مالیت 9 ارب 71 کروڑ سے زائد سے ہے جبکہ بجلی مد میں 6 کروڑ 99 لاکھ سے زائد واجب الادا رقم کی ریکوری کروائی گئی۔
رپورٹ کے مطابق ممنوعہ و غیر رجسٹرڈ ادویات کی فروخت میں ملوث ملزمان کیخلاف 15 مقدمات درج کئے گئے اور چھاپوں کے دوران کروڑوں روپے مالیت کی مشینری اور جعلی ادویات ریکور کی گئی۔ رپورٹ کے مطابق رواں سال کے دوران جعلی نرسنگ اداروں کیخلاف 18 مقدمات،جعلی ٹیکنیکل اینڈ ووکیشنل ٹریننگ انسٹیٹیوٹس کیخلاف 10 مقدمات درج جبکہ پاسپورٹ اور شناختی کارڈ بنانے میں ملوث 18 ملزمان کو گرفتار کیا گیا ہے۔
رپورٹ کے مطابق مبینہ ثبوتوں کی بنیاد پر سرکاری اداروں میں کرپشن میں ملوث عناصر کیخلاف بھی متعدد کارروائیاں کی گئی ہیں۔
