پی ڈی ایم اے نے خیبرپختونخوا کے مختلف علاقوں میں اتوار کی رات سے شدید بارش و مزید برفباری کی پیشگوئی کردی۔
پراونشل ڈیزاسٹر مینجمنٹ اتھارٹی کے مطابق مغربی ہوائوں کا نیا سلسلہ 25سے 27جنوری کے دوران بالائی اضلاع کو متاثر کر سکتا ہے اس دوران موسم کی شدت میں اضافہ متوقع ہے۔
پی ڈی ایم اے الرٹ کے مطابق چترال، دیر، سوات، شانگلہ اور کوہستان میں شدید بارش اور برفباری کا امکان ہے جبکہ ہری پور، پشاور، مردان، نوشہرہ اور کوہاٹ میں بھی گرج چمک کیساتھ بارش متوقع ہے۔
الرٹ میں بالائی علاقوں میں درجہ حرارت میں نمایاں کمی کا خدشہ ظاہر کیا گیا ہے۔
ادھر ناران، کاغان، کالام اور چترال میں سڑکوں پر پھسلن، لینڈ سلائیڈنگ اور برفانی تودے گرنے کے خدشات بھی ظاہر کئے گئے ہیں۔
پی ڈی ایم اے نے تمام ضلعی انتظامیہ کو الرٹ رہنے، مشینری تیار رکھنے اور ہنگامی ردعمل کیلئے پیشگی اقدامات کی ہدایت جاری کر دی ہے۔
