ایشیائی ترقیاتی بینک نے حکومت پنجاب کو زراعت، ویلیو ایڈیشن، زرعی برآمدات اور فشریز شعبوں میں تعاون کی یقین دہانی کرادی۔
ہفتے کو سینئر وزیر حکومت پنجاب مریم اورنگزیب سے ایشیائی ترقیاتی بینک کے اعلی سطح کے وفد نے ملاقات کی۔
وفد میں اے ڈی بی کے ڈائریکٹر جن فینگ ژانگ، کنٹری ڈائریکٹر ایما فان، پروگرام آفیسر خیام سہیل عباسی اور نسنکا سالگادو شامل تھے۔
ملاقات میں صحت، تعلیم، زراعت، فلڈ مینجمنٹ، کلائمیٹ ریزیلینس اور دیگر اہم شعبوں میں جاری و مجوزہ منصوبوں پر تفصیلی تبادلہ خیال کیا گیا۔
مریم اورنگزیب نے کہا کہ وزیراعلی مریم نواز کے وژن کے تحت ترقیاتی منصوبوں میں شفافیت، ڈیجیٹلائزیشن اور مثر منصوبہ بندی کو یقینی بنایا جا رہا ہے، مقصد کیلئے پنجاب ون میپ متعارف کرایا گیا ہے جو زمین اور زیرِ زمین تمام فزیکل اثاثوں، آبادی اور انفراسٹرکچر پر مشتمل ایک جامع ڈیجیٹل نقشہ ہے جس سے تمام سیکٹرز میں بہتر پلاننگ، ڈویلپمنٹ اور مینجمنٹ ممکن ہو سکے گی۔
انہوں نے بتایا کہ تعلیم اور صحت وزیراعلی کی اولین ترجیحات ہیں جن کے تحت میڈیکل ڈسٹرکٹس، جدید کیتھ لیبز اور تعلیمی سہولیات کے ڈیٹا پر مبنی ڈیمانڈ پلاننگ کی جا رہی ہے، سیف سٹی منصوبہ جون تک پنجاب کے تمام 36اضلاع میں مکمل کیا جائے گا جبکہ جون تک 1لاکھ 60ہزار گھر عوام کو فراہم کیے جا رہے ہیں۔
انہوں نے بتایا کہ زراعت کے شعبے میں ای موڈرنیزیشن، ایگریکلچر میکانائزیشن، ایگری بزنس مالز، ایکوا کلچر اور شرمپ فارمنگ پر نمایاں پیش رفت ہو رہی ہے، کسانوں کو اس سال 20ہزار سپریڈرز اور ملچرز فراہم کیے جائیں گے جبکہ سپر سیڈرز کے استعمال سے ماحولیاتی بہتری اور پیداواری لاگت میں کمی آئی ہے۔
صوبائی وزیرنے بتایا کہ فلڈ مینجمنٹ، آبپاشی، کلائمیٹ ایکشن پلان، کولڈ اسٹوریج، لاجسٹکس اور ویلیو ایڈیشن پر بھی مثر عملدرآمد جاری ہے، ریجن کی پہلی کلائمیٹ آبزرویٹری کے قیام پر عملی کام شروع ہو چکا ہے۔
مریم اورنگزیب نے بتایا کہ ای موبیلیٹی ٹرانسپورٹ کے وژن کے تحت گوجرانوالہ اور فیصل آباد میں میٹرو منصوبے، ای بسز اور ای بائیکس متعارف کرائی جا رہی ہیں، سوشل اکنامک رجسٹری کا 98فیصد ڈیٹا مکمل ہو چکا ہے جبکہ 186عوامی خدمات کو ڈیجیٹل کر دیا گیا ہے۔
اس موقع پر بینک وفد نے پنجاب حکومت کی اصلاحات، ڈیجیٹل گورننس اور زرعی ترقیاتی اقدامات کو سراہا اور زراعت، ویلیو ایڈیشن، زرعی برآمدات اور فشریز کے شعبوں میں تعاون کی یقین دہانی کرائی۔
ملاقات کے آخر میں صوبائی وزیر نے وفد کو بسنت فیسٹیول میں اہل خانہ سمیت شرکت کی دعوت بھی دی۔
