وزیراعلی پنجاب مریم نواز نے جوائنٹ فیملی سسٹم کو فروغ دینے کیلئے سانجھے چلھے، سانجھے ویہڑے کے تحت مشترکہ خاندانوں کے گھروں کی توسیع کیلئے بلاسود قرض دینے کا اعلان کردیا۔
جمعہ کو وزیراعلی مریم نواز کی زیر صدارت اپنی چھت اپنا گھر منصوبے سے متعلق اجلاس ہوا۔
وزیراعلی کو بریفنگ میں بتایا گیا کہ اپنی چھت، اپنا گھر کے رجسٹرڈ یوزرز کی تعداد 18لاکھ 80ہزار 81 ہے جب کہ درخواست گزاروں کی تعداد 10لاکھ 66ہزار 559ہے۔
اپنی چھت، اپنا گھر پراجیکٹ کے تحت پنجاب بھر میں 67 ہزار 197 گھر آباد ہو چکے ہیں جب کہ 53ہزار 843مکانات زیر تعمیر ہیں۔
بریفنگ میں بتایا گیا کہ اپنی چھت، اپنا گھر کے تحت 164 ارب 66 کروڑ روپے کے تاریخی قرضے جاری کیے جا چکے ہیں اور اس پروگرام کے تحت ریکوری کی شرح 99 فیصد ہے۔
وزیراعلی مریم نواز شریف نے اپنی چھت، اپنا گھر کے تحت دوسری قسط بھی جلد از جلد ادا کرنے کی ہدایت دی۔
اجلاس میں وزیراعلی نے کہا کہ جوائنٹ فیملی سسٹم کو برقرار رکھنے اور سماجی ترقی و ہم آہنگی کے فروغ کیلئے ‘سانجھے چلھے، سانجھے ویہڑے اور اپنی چھت بھی سانجھی’ کے تصور کے تحت حکومت نے جوائنٹ فیملیز کو خصوصی سہولت فراہم کرنے کا فیصلہ کیا ہے جس کے تحت پنجاب کی جوائنٹ فیملیز کو گھروں کی توسیع کیلئے بلاسود اور آسان اقساط پر قرض فراہم کیا جائے گا۔
وزیراعلی پنجاب نے گھروں کی توسیع کیلئے بلاسود قرضوں کے اجرا کی منظوری بھی دے دی ہے۔
وزیراعلی پنجاب نے جون 2026 تک ایک لاکھ 60ہزار گھر بنانے کا بڑا ہدف مقرر کر تے ہوئے کہا کہ پنجاب میں جن شہریوں کے پاس اپنی زمین نہیں، انہیں زمین بھی فراہم کی جائے گی اور گھر بنانے کیلئے بلاسود اور آسان قرض بھی دیا جائے گا۔
وزیراعلی نے اپنی زمین، اپنا گھر کے تحت 1534پلاٹوں کی الاٹمنٹ کی منظوری دی۔
پہلے مرحلے میں جہلم میں 194، قصور میں 129، فیصل آباد میں 84اور لودھراں میں 59پلاٹس بذریعہ قرعہ اندازی دئیے جائیں گے۔
وزیراعلی نے اپنی زمین، اپنا گھر کے پلاٹس کی جلد از جلد قرعہ اندازی کیلئے اقدامات کی ہدایت بھی جاری کی ہے۔
انہوں نے اپنی چھت، اپنا گھر پراجیکٹ کے فنڈز بڑھانے کیلئے بھی اقدامات کا حکم دیا، اس حوالے سے وزیراعلی کی زیر صدارت خصوصی اجلاس منعقد ہوا، جس میں سیکرٹری ہائوسنگ اور ڈی جی پھاٹا نے تفصیلی بریفنگ دی۔
وزیراعلی نے اپنی چھت، اپنا گھر کے صارفین کے انتقال کی صورت میں متاثرہ خاندانوں کو سہولت فراہمی کیلئے پالیسی مرتب کرنے کی بھی ہدایت کی ۔
