وفاقی وزیر خزانہ محمد اورنگزیب نے کہا ہے کہ قرض اگر درست جگہ استعمال ہو تو معیشت کیلئے نقصان دہ نہیں ہے، پاکستان نے قرضہ جی ڈی پی شرح 75فیصد سے کم کرکے 70فیصد کرلی، شرح سود 22فیصد سے زائد سے کم ہو کر 10.5فیصد پر آگئی ہے۔
عالمی اقتصادی فورم کے موقع پر مذاکرے میں گفتگو کرتے ہوئے وزیر خزانہ نے کہا کہ پاکستان نے پرائمری سرپلس حاصل کرکے مالی توازن بحال کیا، مہنگائی 38 فیصد سے کم ہو کر سنگل ڈیجٹ میں آ گئی ہے پاکستان گرین پانڈا بانڈ کے ذریعے چینی مارکیٹ میں داخل ہونے کیلئے تیار ہے۔
انکا کہنا تھا کہ موسمیاتی تبدیلی پاکستان کیلئے بڑا اورمسلسل خطرہ ہے، حالیہ سیلاب میں پاکستان نے اپنے وسائل سے نمٹا، عالمی اپیل کی ضرورت نہ پڑی، اصل مسئلہ فنڈز نہیں، موثر عملدرآمد اور صلاحیت سازی ہے، ریکوڈک منصوبے سے 2028 کے بعد سالانہ 2.8 ارب ڈالر برآمدات متوقع ہے آئی ٹی اور فری لانسنگ میں پاکستان میں بڑی ترقی کے مواقع موجود ہے۔
