ارمچی (شِنہوا) چین کےشمال مغربی سنکیانگ ویغور خود مختار خطے میں گاڑیوں کی برآمد کے لئے چین کی سب سے بڑی زمینی بندرگارہ، ہورگوس پورٹ نے 2025 کے دوران گاڑیوں کی برآمد کا نیا ریکارڈ قائم کر لیا ہے۔
ہورگوس کسٹمز کی جانب سے جاری کردہ اعداد و شمار کے مطابق گزشتہ سال اس بندرگاہ کے ذریعے ساڑھے 4 لاکھ گاڑیاں برآمد کی گئیں جو گزشتہ سال کے مقابلے میں 6.9 فیصد اضافہ ظاہر کرتی ہیں۔ اس وقت اوسطاً روزانہ ایک ہزار سے زائد گاڑیاں اس پورٹ سے باہر روانہ ہوتی ہیں۔
قازقستان کی سرحد پر واقع یہ پورٹ چینی گاڑیوں، خاص طور پر نئی توانائی والی گاڑیوں (این ای ویز) کے لئے بین الاقوامی منڈیوں تک پہنچنے کا ایک "سنہری راستہ” بن چکی ہے۔ کسٹمز کے مطابق چین کی نئی توانائی والی گاڑیاں اپنی تکنیکی برتری اور قیمتوں میں بچت کی وجہ سے وسطی ایشیا اور روس میں بے حد مقبول ہو رہی ہیں جو کہ برآمدات میں اضافے کی کلیدی وجہ ہے۔
ہورگوس کسٹمز نے کلیئرنس کا ایک جدید نظام متعارف کرایا ہے جس کے تحت تجارتی گاڑیوں کو براہ راست چلا کر پورٹ سے باہر لے جایا جا سکتا ہے۔ کسٹمز کا کہنا ہے کہ اس اقدام نے کلیئرنس کی کارکردگی بڑھانے میں اہم کردار ادا کیا ہے۔ اس سے قبل زیادہ تر برآمدی گاڑیاں ٹرکوں پر لاد کر پورٹ سے باہر لے جائی جاتی تھیں۔
