صدر ٹرمپ کی جانب سے گرین لینڈ پر قبضے کیلئے حملے کی دھمکی کے بعد یورپی یونین نے امریکا کیساتھ تجارتی معاہدہ معطل کرنے پر غور شروع کر دیا ہے۔
غیر ملکی میڈیا کی رپورٹ میں بتایا گیا ہے کہ گرین لینڈ کے معاملے نے امریکا اور اس کے یورپی اتحادیوں کے درمیان تجارتی تنازع کھڑا کر دیا ہے اور یورپ نے امریکی صدر ڈونلڈ ٹرمپ کی جانب سے متعدد یورپی ملکوں پر ٹیرف لگانے پر جوابی اقدامات کی وارننگ دی ہے۔
میڈیا رپورٹ کے مطابق امریکی صدر نے کہا تھا کہ امریکا متعدد یورپی ملکوں پر کسٹم ڈیوٹی لگائے گا، یہ اقدامات گرین لینڈ کی خریداری کا معاہدہ طے پانے تک جاری رہیں گے، اس خریداری کی وجہ انہوں نے امریکی اور عالمی قومی سلامتی کو درپیش خطرات بتائے۔
امریکی صدر نے ٹروتھ سوشل پر ایک پوسٹ میں کیا تھا کہ واشنگٹن نے ڈنمارک، تمام یورپی یونین اور دیگر ملکوں کی کئی سالوں تک ڈیوٹی یا معاوضے کی کسی بھی شکل کے بغیر حمایت کی ہے اور اب وقت آگیا ہے کہ وہ اسکا بدلہ چکائیں کیونکہ عالمی امن دا پر ہے، یکم فروری 2026 سے مذکورہ ملکوں سے امریکا آنیوالی تمام اشیاء پر 10 فیصد کسٹم ڈیوٹی لگائی جائیگی جسے یکم جون 2026 سے بڑھا کر 25 فیصد کر دیا جائیگا۔
انہوں نے زور دیا تھا کہ یہ ڈیوٹی اسوقت تک نافذ رہے گی جب تک گرین لینڈ کی مکمل خریداری کا معاہدہ نہیں ہو جاتا، انہوں نے نشاندہی کی کہ امریکا 150 سال سے زائد عرصے سے گرین لینڈ حاصل کرنے کی کوشش کر رہا ہے اور جدید دفاعی نظام گولڈن ڈوم کی وجہ سے اسکی ضرورت انتہائی ناگزیر ہو چکی ہے۔
