فرانس نے گرین لینڈ کے معاملے پر ٹیرف کی امریکی دھمکیوں کو "ناقابل قبول” قرار دے دیا

پیرس (شِنہوا) فرانس کے صدر ایمانوئل میکرون نے گرین لینڈ کے معاملے پر ٹیرف کی امریکی دھمکیوں کو "ناقابل قبول” قرار دیتے ہوئے کہا ہے  کہ اگر یہ دھمکیاں حقیقت ثابت ہوئیں تو یورپی ممالک متحد اور مربوط انداز میں ردعمل دیں گے۔

میکرون نے اپنے ایکس اکاؤنٹ پر بھی کہا کہ فرانس قومی خودمختاری اور آزادی کے اصول پر قائم ہے اور اسی بنیاد پر فرانس نے ڈنمارک کی جانب سے گرین لینڈ میں منعقدہ مشق میں حصہ لینے کا فیصلہ کیا ہے۔

انہوں نے زور دے کر کہا کہ کوئی بھی دھمکی یا خوف ہمیں متاثر نہیں کرے گا۔

میکرون کے یہ بیانات امریکی صدر ڈونلڈ ٹرمپ کے اعلان کے جواب میں سامنے آئے جس میں ٹرمپ نے کہا کہ یکم فروری سے امریکہ ڈنمارک، ناروے، سویڈن، فرانس، جرمنی، برطانیہ، نیدرلینڈز اور فن لینڈ سے گرین لینڈ کے لئے درآمد ہونے والی اشیاء پر 10 فیصد محصولات عائد کرے گا اور اگر امریکہ کو یہ علاقہ خریدنے کا معاہدہ نہ ملا تو جون کے آغاز سے یہ محصولات 25 فیصد تک بڑھا دی جائیں گی۔

گرین لینڈ دنیا کا سب سے بڑا جزیرہ ہے اور ڈنمارک کا ایک خودمختار علاقہ ہے، جہاں کوپن ہیگن دفاع اور خارجہ پالیسی پر کنٹرول رکھتا ہے۔ امریکہ نے اس جزیرے پر ایک فوجی اڈہ قائم کیا ہوا ہے۔ 2025 میں دوبارہ صدارت سنبھالنے کے بعد ٹرمپ نے بار بار گرین لینڈ کو "حاصل کرنے” کی خواہش کا اظہار کیا ہے۔