بیجنگ (شِنہوا) چینی وزیر خارجہ وانگ یی نے کہا کہ چین کینیڈا کے ساتھ رابطے مضبوط کرنے، اعتماد بڑھانے، مداخلت ختم کرنے اور تعاون کو مضبوط بنانے کا خواہاں ہے تاکہ نئے حالات میں دو طرفہ تعلقات کو مستحکم اور مضبوط انداز میں آگے بڑھایا جا سکے۔
کمیونسٹ پارٹی آف چائنہ کی مرکزی کمیٹی کے سیاسی بیورو کے رکن اور وزیر خارجہ وانگ یی نے یہ بات بیجنگ میں کینیڈا کی وزیر خارجہ انیتا انند سے ملاقات کے دوران کہی۔
کینیڈا کے وزیراعظم مارک کارنی کے چین کے دورے کا حوالہ دیتے ہوئے، جو آٹھ سال میں کسی کینیڈین وزیراعظم کا پہلا دورہ ہے، وانگ یی نے کہا کہ یہ دورہ دو طرفہ تعلقات میں ایک سنگ میل کی حیثیت رکھتا ہے اور تعلقات میں ایک نیا موڑ ظاہر کرتا ہے۔
انہوں نے مزید کہا کہ دونوں ممالک کے رہنما ملاقاتیں اور بات چیت کریں گے جس میں دو طرفہ تعلقات کے لئے نئے امکانات کھولنے کی توقع ہے۔
وانگ یی نے کہا کہ آج دنیا گہرے اور پیچیدہ تبدیلیوں سے گزر رہی ہے اور چین-کینیڈا تعلقات کا اثر صرف دو طرفہ حد تک محدود نہیں ہے۔
کینیڈین وزیر خارجہ انیتا انند نے کہا کہ نئی کینیڈین حکومت چین کے ساتھ تعلقات کو بہت اہمیت دیتی ہے۔ انہوں نے مزید کہا کہ وزیراعظم مارک کارنی چین کے دورے میں چینی رہنماؤں کے ساتھ گہرے تبادلہ خیال کے منتظر ہیں تاکہ دو طرفہ تعلقات کی ترقی کے لئے رہنمائی فراہم کی جا سکے، مختلف شعبوں میں بات چیت کو دوبارہ شروع کیا جا سکے، زیادہ باہمی فائدہ مند نتائج حاصل کئے جا سکیں، کثیرجہتی امور میں ہم آہنگی اور تعاون بڑھایا جا سکے اور دونوں ممالک کے درمیان تزویراتی شراکت داری کو مزید آگے بڑھایا جا سکے۔
