اسپیکر قومی اسمبلی سردار ایاز صادق سے پاکستان میں تعینات چین کے سفیر جیانگ ژائی ڈونگ نے ملاقات کی، جس میں پاک–چین دوستی سمیت اہم علاقائی اور عالمی امور پر تفصیلی تبادلہ خیال کیا گیا۔
ملاقات کے دوران اسپیکر سردار ایاز صادق نے کہا کہ چین پاکستان کا قریبی، قابلِ اعتماد اور ہر آزمائش کی گھڑی میں ساتھ کھڑا رہنے والا ملک ہے۔ انہوں نے کہا کہ پاکستان کو چین کے ساتھ اپنی سدا بہار دوستی پر فخر ہے، جو باہمی اعتماد اور احترام کی مضبوط بنیادوں پر استوار ہے۔
اسپیکر قومی اسمبلی نے کہا کہ پاکستان اور چین اسٹریٹجک شراکت دار ہیں اور دونوں ممالک نے ہر مشکل وقت میں ایک دوسرے کے شانہ بشانہ کھڑے ہو کر دوستی کی مثال قائم کی ہے۔ انہوں نے پاکستان اور چین کے مابین اقتصادی اور دفاعی شعبوں میں قریبی تعاون کو قابلِ ستائش قرار دیتے ہوئے کہا کہ پاک–چین دفاعی تعاون خطے میں پائیدار امن کے قیام کے لیے اہم کردار ادا کر رہا ہے۔
سردار ایاز صادق نے اپنی گزشتہ اسپیکر شپ کا حوالہ دیتے ہوئے کہا کہ صدر شی جن پھنگ کا پاکستان کی پارلیمنٹ کے مشترکہ اجلاس سے خطاب تاریخی اہمیت کا حامل تھا، جو دونوں ممالک کے گہرے تعلقات کی عکاسی کرتا ہے۔
چینی سفیر جیانگ ژائی ڈونگ نے اسپیکر قومی اسمبلی کے چین کے لیے مثبت تاثرات کو سراہتے ہوئے کہا کہ دونوں ممالک کے عوام ایک دوسرے سے دوستی کے مضبوط رشتے میں بندھے ہوئے ہیں۔ انہوں نے اس بات پر زور دیا کہ پاک–چین اسٹریٹجک شراکت داری ہر گزرتے دن کے ساتھ مزید مضبوط ہو رہی ہے۔
ملاقات خوشگوار ماحول میں اختتام پذیر ہوئی اور دونوں فریقین نے پاک–چین تعلقات کو مزید فروغ دینے کے عزم کا اعادہ کیا۔
