وفاقی وزیر اطلاعات عطا اللہ تارڑ نے کہا ہے کہ یونیورسٹی آف لندن نے پاکستان میں تعلیم کے فروغ کیلئے نمایاں خدمات انجام دی ہیں، پاکستان کے تعلیمی شعبے سے اسکی وابستگی اور خلوص قابل ستائش ہے، دونوں کے درمیان تعلیمی تعلق وقت کیساتھ مزید مضبوط اور موثر ہوتا چلا گیا ہے، یونیورسٹی کی پاکستان کے تعلیمی شعبے سے وابستگی اور خلوص کو سراہتا ہوں۔
یونیورسٹی آف لندن کے وفد کے اعزاز میں منعقدہ تقریب سے خطاب کرتے ہوئے انہوں نے کہا کہ معزز اور باوقار اجتماع سے خطاب کا موقع ملنا ان کیلئے باعث اعزاز و افتخار ہے، یونیورسٹی آف لندن کا تعلیمی سفر کئی دہائیوں پر محیط ہے، یونیورسٹی کی جانب سے جدت، اختراع اور نئے تعلیمی ماڈیولز متعارف کرائے گئے جس سے پاکستان میں تعلیمی معیار کو ایک نئی جہت ملی۔
وزیراطلاعات نے کہا کہ مسلسل بہتری اور جدت کو اپنانا یونیورسٹی آف لندن کی نمایاں پہچان ہے، یونیورسٹی تحقیق و ترقی پر بھرپور توجہ دے رہی ہے اور ہر گزرتے سال کیساتھ تعلیمی معیار میں واضح بہتری دیکھنے میں آ رہی ہے۔
انہوں نے کہا کہ یونیورسٹی آف لندن کے پروگرامز نہ صرف پاکستان بلکہ دنیا بھر میں موجود ہیں، ہم خوش قسمت ہیں کہ دوران تعلیم ہمیں ممتاز اور باوقار اساتذہ کی رہنمائی حاصل رہی جبکہ آئوٹ ریچ جیسے پروگرامز تعلیم کے فروغ میں اہم کردار ادا کرینگے۔
