سپین کے بادشاہ فیلپے ششم اور ملکہ لیٹیزیا کی بڑی بیٹی 21 سالہ شہزادی لیونور ملک کی آئندہ ملکہ بننے کیلئے تیار ہیں انکی تخت نشینی کے بعد سپین کو 150 سال بعد پہلی بار ایک بااختیار ملکہ ملے گی، اس سے قبل آخری خاتون حکمراں ملکہ ازابیلا دوم تھیں جن کی حکومت 1868میں ختم ہوئی۔
غیر ملکی میڈیا کے مطابق شہزادی لیونور 2005 میں پیدا ہوئیں اور اس وقت سپین کی ولی عہد ہیں، ہسپانوی شاہی خاندان میں بادشاہت کا سلسلہ بوربن خاندان کے پاس ہے جو 18ویں صدی سے اقتدار میں ہے، 2014 میں بادشاہ خوان کارلوس اول کے دستبردار ہونے کے بعد فیلپے ششم بادشاہ بنے اور اب انکے بعد لیونور تخت کی وارث ہیں۔
ہسپانوی قانون کے مطابق ولی عہد کیلئے فوجی تربیت لازمی ہے، شہزادی لیونور نے ویلز کے یو ڈبلیو سی اٹلانٹک کالج سے انٹرنیشنل بکلوریٹ مکمل کیا جس کے بعد انہوں نے فوجی تربیت کا آغاز کیا، وہ ہسپانوی، کاتالان، انگریزی، فرانسیسی، عربی اور مینڈرن زبانوں پر عبور رکھتی ہیں، اگست 2023 میں انہوں نے زرگوزا میں آرمی ٹریننگ شروع کی، 2024 میں بحریہ کی تربیت حاصل کی اور تربیتی جہاز خوان سباستیان دے الکانو پر 140 دن کا 17 ہزار میل کا سمندری سفر کیا جس میں وہ عملے کے رکن کے طور پر شامل رہیں، بعدازاں جنگی جہاز بلاس دے لیزو پر بھی خدمات انجام دیں۔
دسمبر 2025 میں شہزادی لیونور نے پائلٹس پی سی-21طیارے میں اپنی پہلی تنہا پرواز مکمل کی جس کے بعد وہ ہسپانوی شاہی خاندان کی پہلی خاتون بن گئی ہیں جنہوں نے یہ اعزاز حاصل کیا۔
ایئر فورس کی تربیت کے دوران اِنہیں خطے کا اعلی ترین اعزاز گولڈ میڈل آف ریجن آف مرسیا دینے کا اعلان کیا گیا ہے، یہ انکے مستقبل کے کردار بطور سپین کی مسلح افواج کی کمانڈر انچیف کی جانب ایک اہم قدم قرار دیا جا رہا ہے۔
