پنجاب حکومت نے پیٹرول اور ڈیزل گاڑیوں کی خریداری پر مکمل پابندی عائد کرنے کا فیصلہ کرلیا تاہم فیلڈ ڈیوٹی پر مامور گاڑیوں کو اس پابندی سے مستثنیٰ قرار دیا گیا ہے۔
ذرائع کے مطابق پابندی کے تحت آئندہ صرف الیکٹرک یا ہائبرڈ گاڑیاں ہی خریدی جا سکیں گی۔
جاری بیان میں چیف سیکرٹری پنجاب نے کہا ہے کہ صوبے میں ماحولیاتی تحفظ کیلئے گرین انرجی کا فروغ ترجیح ہے، اسی مقصد کے تحت نئی الیکٹرک وہیکل پالیسی جلد متعارف کرائی جائے گی۔
انہوں نے بتایا کہ آئندہ نئے پیٹرول پمپس کیلئے این او سی کی منظوری کو الیکٹرک چارجنگ یونٹ کی تنصیب سے مشروط کردیا گیا ہے، کسی بھی نئے پیٹرول پمپ کو الیکٹرک چارجنگ یونٹ لگائے بغیر کام کرنے کی اجازت نہیں ہوگی۔
چیف سیکرٹری کے مطابق این او سی حاصل کرنیوالے نئے 170 پیٹرول پمپس پر الیکٹرک چارجنگ یونٹس کی تنصیب کو لازمی قرار دیا گیا ہے جب کہ صوبے کے 31شہروں میں 170نئے پیٹرول پمپس کیلئے ای بز پورٹل کے ذریعے این او سیز جاری کیے گئے ہیں۔
انہوں نے بتایا کہ فیصل آباد میں 29، لاہور میں 14، بہاولپور میں 10جبکہ خانیوال اور بہاولنگر میں 9، 9 نئے پیٹرول پمپس کو الیکٹرک چارجنگ کی سہولت فراہم کرنے کا پابند کیا گیا ہے، اسی طرح راولپنڈی اور جھنگ میں 8جبکہ ٹوبہ ٹیک سنگھ، میانوالی، قصور اور چنیوٹ میں 7، 7 نئے پیٹرول پمپس کو الیکٹرک چارجنگ یونٹ لگانے کی شرط پر منظوری دی گئی ہے۔
