وفاقی وزیر بحری امور محمد جنید انوار چوہدری نے زیارت حسن شاہ جزیرے کو جدید ایکو ٹورازم حب میں تبدیل کرنے کا اعلان کر دیا۔
جاری بیان میں محمد جنید انوار چوہدری نے کہا کہ زیارت حسن شاہ آئی لینڈ کو ماحولیاتی لحاظ سے محفوظ، جدید اور عالمی معیار کے سیاحتی مرکز کی شکل دی جائے گی، منصوبے کے تحت ایکو فرینڈلی، سپورٹس اور لائف سٹائل ٹورازم پر مبنی جامع منصوبہ متعارف کرایا جائے گا جس سے ملکی و غیر ملکی سیاحوں کو متوجہ کیا جا سکے گا، زیارت حسن شاہ جزیرے پر اربوں روپے کی سرمایہ کاری متوقع ہے جبکہ منصوبے پر ابتدائی طور پر ایک سے ڈیڑھ ارب روپے لاگت آنے کا تخمینہ لگایا گیا ہے۔
وفاقی وزیر نے کہا کہ زیارت حسن شاہ جزیرہ بلیو اکانومی کی ایک نئی اور کامیاب مثال بنے گا جو نہ صرف سیاحت کے فروغ بلکہ روزگار کے نئے مواقع پیدا کرنے میں بھی اہم کردار ادا کرے گا۔
جنید انوار چوہدری نے کہا کہ زیارت حسن شاہ جزیرہ زمینی راستے کے ذریعے کراچی کے یسٹرن زون سے منسلک ہوگا جس سے رسائی مزید آسان ہو جائے گی جبکہ حکومت پاکستان کی ساحلی پٹی کو معاشی انجن بنانے کیلئے بھرپور اقدامات کر رہی ہے۔
