صومالیہ نے متحدہ عرب امارات کیساتھ تمام معاہدے منسوخ کر دئیے ہیں جن میں بندرگاہوں، دفاع اور سکیورٹی تعاون سے متعلق معاہدے بھی شامل ہیں، صومالیہ کی حکومت نے کہا ہے کہ یو اے ای نے ملکی خود مختاری کو نقصان پہنچانے والے اقدامات کئے ہیں، فیصلہ ٹھوس شواہد کی بنیاد پر کیا گیا ہے جن سے ظاہر ہوتا ہے کہ یو اے ای کے بعض اقدامات صومالیہ کی خودمختاری، قومی وحدت اور سیاسی آزادی کیلئے نقصان دہ ثابت ہو رہے تھے۔
یہ اعلان صومالیہ کی کونسل آف منسٹرز کے اہم اجلاس کے بعد وزیر دفاع احمد معلم فقی نے سوشل میڈیا پلیٹ فارم ایکس پر اپنے بیان میں کیا، انکا کہنا تھا کہ حکومت کے پاس قابل اعتماد رپورٹس موجود ہیں جو متحدہ عرب امارات کی جانب سے صومالیہ کی ریاستی خودمختاری اور اتحاد کو کمزور کرنے کی نشاندہی کرتی ہیں۔
صدارتی محل سے جاری تصاویر کے مطابق صدر حسن شیخ محمود نے غیر معمولی فیصلے پر پارلیمنٹ کے ہنگامی مشترکہ اجلاس سے خطاب بھی کیا جس میں قومی سلامتی اور خارجہ پالیسی پر تفصیلی گفتگو کی گئی۔
یو اے ای اور صومالیہ کے درمیان بندرگاہوں، دفاعی تعاون کے معاہدے ہیں، تاحال متحدہ عرب امارات کی جانب سے صومالیہ کے اس اچانک اور سخت فیصلے پر کوئی باضابطہ ردعمل سامنے نہیں آیا تاہم مبصرین کے مطابق اسکے اثرات خطے کی سیاست اور بحری تجارت پر دور رس ہو سکتے ہیں۔
