سندھ کے وزیر داخلہ ضیا الحسن لنجار نے کہا ہے کہ اب اگر کسی بھی سڑک پر جلسہ ہوگا تو حکومت سندھ سخت ایکشن لے گی، انہوں نے واضح پیغام دیتے ہوئے کہا کہ پی ٹی آئی کو باغ جناح میں جلسہ کرنے کی اجازت ہے، سندھ حکومت نے پی ٹی آئی کو جہاں جلسے کی اجازت دی ہے وہیں جلسہ کرے، حکومت کی رٹ کو چیلنج کرنے کی ہرگز اجازت نہیں دی جائیگی۔
انہوں نے کہا کہ کراچی والے شاید پی ٹی آئی کیساتھ نہیں اسی لئے پی ٹی آئی روڈ پر جلسہ چاہتی ہے، پی ٹی آئی والوں کا روڈ شو پر اصرار دراصل بہانے بازی ہے، ہماری جانب سے گراؤنڈ سے باہر جلسے کی اجازت نہیں ہے، قانون توڑا تو اجازت نامہ منسوخ ہوجائیگا۔
انہوں نے کہا ہے کہ سہیل آفریدی آزادانہ نقل و حرکت کر رہے ہیں، انکو عزت دی اور جلسہ گاہ انہوں نے خود تجویز کی ہے۔
انکا کہنا تھا کہ کراچی میں سکیورٹی مسائل بھی ہیں اور ناصر شاہ و سعید غنی پی ٹی آئی سے رابطے میں ہیں۔
