سرگودھا: قومی اسمبلی میں اپوزیشن لیڈر عمر ایوب نے کہا ہے کہ 9 مئی کے ثبوت ہیں تو سامنے لائے جائیں، بانی پی ٹی آئی کا فوجی ٹرائل نہیں ہوگا،بلوچستان آگ میں جل رہا ہے کسی کو فکر نہیں۔سرگودھا میں میڈیا سے گفتگو کرتے ہوئے قومی اسمبلی میں اپوزیشن لیڈر عمر ایوب نے کہا کہ اگر 9 مئی کے ثبوت ہیں تو سامنے لائے جائیں، پی ٹی آئی کے جن رہنماؤں کے فوجی ٹرائل ہو رہے ہیں وہ سیاسی قیدی ہیں، بانی پی ٹی آئی کا فوجی ٹرائل نہیں ہوگا۔
انہوں نے کہا کہ بلوچستان آگ میں جل رہا ہے کسی کو فکر نہیں،اختر مینگل سے کہا ہے کہ وہ اپنا استعفیٰ واپس لے لیں۔ انہوں نے کہا کہ بجلی سستی کرنے کا اعلان کر کے اگلے دن ہی بجلی مہنگی کر دی گئی، فارم 47 کی حکومت مہنگائی کنٹرول کرنے میں ناکام ہو چکی ہے۔
انہوں نے کہا کہ اپوزیشن جماعت ملک اور جمہوریت کی بقاء کی جدوجہد کر رہی ہے۔انہوں نے کہا کہ چینی اور گندم سکینڈل میں محسن نقوی براہ راست ملوث ہیں، سکینڈل کی انکوائری ایف آئی اے کر رہی ہے جو وزیر داخلہ کے ماتحت ہے۔
