پشاور: مشیراطلاعات خیبرپختونخوا بیرسٹر سیف نے کہا ہے کہ8ستمبر کا جلسہ روکنے کی کوشش کی گئی تو معاملہ تصادم کی جانب جانے کا خدشہ ہے، فیصل کریم کنڈی کو اب تک یقین نہیں آرہا وہ گورنرہیں، ان کا کام روزانہ اٹھ کر بیانات داغنا ہے،اسمبلی میں دو تہائی اکثریت، انہیں شوق ہے تو وزیراعلی کو تحریری اعتماد کا ووٹ لینے کا کہہ کر قانونی تقاضا پورا کریں۔
تفصیلات کے مطابق پشاور میں پریس کانفرنس کرتے ہوئے مشیراطلاعات خیبرپختونخوا بیرسٹر سیف نے کہا کہ گورنرفیصل کریم کنڈی کو ابھی تک یقین نہیں آرہا کہ وہ گورنرہیں، وہ روزانہ اٹھ کرشیشے میں دیکھتے ہیں کہ گورنرہاؤس میں ہیں کہ نہیں، ان کا کام بس روزانہ اٹھ کر بیانات داغنا ہے۔
انہوں نے کہا کہ وزیراعلی علی امین گنڈا پور کس بات کا ووٹ لیں، اسمبلی کی نشستیں دیکھ لیں، اسمبلی میں دو تہائی اکثریت ہے، گورنر کو شوق ہے تو بیان کی بجائے وزیراعلیٰ کو تحریری طورپر اعتماد کا ووٹ لینے کا کہہ کر قانونی تقاضا پورا کریں۔
انہوں نے کہا کہ یہ بھی الزام لگایا گیا کہ وزیراعلی تبادلوں کیلئے پیسے لیتے ہیں، کیس عدالت میں چلا گیا ہے اب ثابت کریں، اگر گورنر الزام ثابت نہیں کرسکتے تو پھر انہیں مستعفی ہونا چاہئے۔انہوں نے کہا کہ پی ٹی آئی کا 8 ستمبر کو جلسہ ہو رہا ہے، خیبرپختونخوا سے کارکنوں کی بڑی تعداد اسلام آباد پہنچے گی۔
انہوں نے کہا کہ رانا ثنا اللہ اور محسن نقوی کو جلسے کا خوف ہے،ہمیں خدشہ ہے کہ حکومت خوف کے باعث جلسے کا این او سی کینسل کردے گی انہوں نے کہا کہ جلسہ روکنے کی کوشش کی گئی تو پھر معاملہ تصادم کی طرف جانے کا خدشہ ہے۔
