اسلام آباد: وزیر داخلہ محسن نقوی نے کہا ہے کہ انسداد دہشت گردی بارے ترکیہ کے تعاون کا خیر مقدم کریں گے، پاکستان نے بحیثیت قوم دہشت گردی کیخلاف جنگ انمٹ قربانیاں دی ہیں، پاکستان ترکیہ کے درمیان برادرانہ تعلقات کو مضبوط سے مضبوط تر بنانا چاہتے ہیں۔
تفصیلات کے مطابق ترکیہ کے سفیر ڈاکٹر مہمت پاچاجی نے وزارت داخلہ کا دورہ کیا اور وفاقی وزیر داخلہ محسن نقوی سے ملاقات کی جس میں پاکستان ترکیہ تعلقات و باہمی دلچسپی کے امور پر تفصیلی تبادلہ خیال کیا گیا۔دونوں رہنماؤں نے انسداد دہشت گردی، پولیس اور سول آرمڈ فورسز کے شعبوں میں تعاون،پاکستان ترکیہ کے درمیان پروازوں کی تعداد بڑھانے پر اتفاق کیا۔ترک سفیر نے بلوچستان میں دہشت گردوں کے حملوں کی مذمت کرتے ہوئے کہا کہ کچھ عرصہ قبل ترکیہ کو بھی دہشت گردی کا سامنا تھا، ہم نے دہشتگردی پر قابو پایا اور اب حالات بہتر ہیں، انہوں نے انسداد دہشت گردی بارے پاکستان کو ہر ممکن تعاون کی پیشکش کی۔
اس موقع پر گفتگو کرتے ہوئے وزیر داخلہ محسن نقوی نے کہا کہ پاکستان نے بحیثیت قوم دہشت گردی کیخلاف جنگ میں انمٹ قربانیاں دی ہیں، پاک فوج، پولیس، رینجرز، ایف سی سمیت ہر طبقے نے خون دے کر اس جنگ میں تاریخ رقم کی ہے۔
انہوں نے کہا کہ انسداد دہشت گردی کے حوالے سے ترکیہ کے تعاون کا خیر مقدم کریں گے۔انہوں نے کہا کہ ترکیہ حکومت کی دعوت پر اکتوبر میں ترکیہ کا دورہ کروں گا، جس میں باہمی تعاون کو مزید مضبوط بنانے کیلئے اقدامات تجویز کریں گے۔
انہوں نے کہا کہ پاکستان اور ترکیہ کے مابین مثالی برادرانہ تعلقات کو مضبوط سے مضبوط تر بنانا چاہتے ہیں، پاکستانی ترکیہ کو اپنا دوسرا گھر سمجھتے ہیں۔وزیر داخلہ نے دو طرفہ تعلقات کے فروغ میں ڈاکٹر مہمت پاچاجی کی خدمات کو سراہا اور انہیں اسلاموفوبیا سے نمٹنے بارے او آئی سی میں بطور خصوصی ایلچی تعیناتی پر مبارکباد پیش کی۔
