خیبر پختونخوا و گلگت بلتستان کے بالائی علاقوں میں بارش و برفباری سے موسم شدید سرد ہوگیا جبکہ رابطہ سڑکیں برف سے ڈھکنے کے باعث بند ہوگئیں۔
دوسری جانب محکمہ موسمیات نے مزید بارشوں و برفباری کی پیشگوئی کر دی۔
محکمہ موسمیات کے دیر لوئر اور دیر اپر کے شہری علاقوں میں بارش اور پہاڑوں پر برفباری کا سلسلہ وقفے وقفے سے جاری ہے۔
وادی کمراٹ، جہاز بانڈہ، باڈگوائی، لواری ٹنل، کلپانی، شاہی، بن شاہی اور عشیرئی درہ میں ایک فٹ برف پڑ چکی ہے۔
بارش اور برف باری سے سردی کی شدت بڑھ گئی ہے، برف باری سے لطف اندوز ہونے کے لیے سیاحوں نے سیاحتی علاقوں کا رخ کرنا شروع کر دیا۔ایبٹ آباد شہر اور گردونواح میں میں ہلکی بارش سے موسم شدید سرد ہوگیا جبکہ نتھیاگلی، ایوبیہ اور ڈونگا گلی میں دوسرے روز بھی موسلا دھار بارش جاری رہی۔
نتھیاگلی، گلیات اور ٹھنڈیانی میں بھی بارش جبکہ بالائی پہاڑوں پر ہلکی برفباری ہوئی۔ڈی جی گلیات کے مطابق گلیات، نتھیا گلی اور ٹھنڈیانی میں برف باری کا نیاسپیل متوقع ہے جبکہ شہری علاقوں میں تیز بارش کے امکانات ہیں۔
ڈی جی گلیات نے ہدایت کی کہ پہاڑی علاقوں میں غیر ضروری سفر سے گریز کیا جائے۔
محکمہ موسمیات کے مطابق وادی کاغان کے بالائی مقامات ناران، بابو سر، جھیل سیف الملوک اور دیگر مقامات پر برفباری کا سلسلہ بھی جاری ہے، ناران میں 6 انچ جبکہ جھیل سیف الملوک اور بابو سر ٹاپ پر ایک فٹ سے زائد برفباری پڑ چکی ہے۔
بالاکوٹ و گردونواح میں بارش کا سلسلہ دوسرے روز بھی وقفے وقفے سے جاری ہے، بارش سے گردو غبار کا خاتمہ ہوگیا اور موسم میں نکھار آگیا۔
محکمہ موسمیات کے مطابق بالاکوٹ میں بارش جبکہ پہاڑوں پر برفباری سے سردی کی شدت میں اضافہ ہوگیا۔
گلگت بلتستان میں غذر کے بالائی علاقہ یاسین میں بھی موسم سرما کی پہلی برفباری شروع ہوگئی، برفباری کے باعث یاسین کی رابطہ سڑکیں برف سے ڈھک گئیں جس سے عوام کو شدید سفری مشکلات کا سامنا ہے۔
