وفاقی وزیر داخلہ محسن نقوی نے کہا ہے کہ پاکستان کی عزت اور بیرون ملک جانیوالے مسافروں کی سہولت سب سے زیادہ عزیز ہے، کسی بھی مسافر کو بلاجواز سفر سے نہیں روکا جائیگا، پیشہ ور بھکاری یا نامکمل دستاویزات پر کسی کو سفر کی اجازت نہیں دی جا سکتی، پاکستان کی بدنامی کا باعث بننے والوں کی جگہ جیل ہے۔
ان خیالات کا اظہار انہوں نے وزیر مملکت داخلہ طلال چودھری کے ہمراہ گزشتہ روز لاہور ایئرپورٹ کے اچانک دورے کے دوران مسافروں سے گفتگو کرتے ہوئے کیا۔
اس موقع پر وزرائے داخلہ امیگریشن کانٹرز پر گئے اور بیرون ممالک جانیوالے مسافروں کے امیگریشن کے عمل کا جائزہ لیا، انہوں نے بیرون ممالک جانیوالے مسافروں سے گفتگو کی اور ان سے امیگریشن کے عمل کے بارے میں دریافت کیا۔
محسن نقوی نے امیگریشن کائونٹر پر ایف آئی اے اہلکار کو اچھی کارکردگی پر شاباش دیتے ہوئے انکی حوصلہ افزائی کی۔
اس موقع پر ایک مسافر نے وفاقی وزیر داخلہ سے چیکنگ میں تاخیر کے باعث بورڈنگ بند ہونے کی شکایت کی جس پر وزیر داخلہ نے متعلقہ حکام کو کویت جانیوالے مسافر کی بورڈنگ کرانے کے احکامات دیئے، مسافروں نے وزرائے داخلہ کو بتایا کہ چند منٹ میں امیگریشن کا عمل مکمل ہو رہا ہے ۔
