چیئرمین پی ٹی آئی بیرسٹر گوہر نے کہا ہے کہ ہم تین کروڑ عوام کی نمائندگی کر رہے، سسٹم کا حصہ ملک میں جمہوریت برقرار رکھنے کیلئے ہیں، فیڈریشن کے یونٹس کو ایک دوسرے کیخلاف کھڑا کیا جارہا، مائنس ون ہوا تو کوئی باقی رہے گا نہ حالات کنٹرول میں آئیں گے۔
بدھ کو پارلیمنٹ ہائوس کے باہر میڈیا سے گفتگو کرتے ہوئے بیرسٹر گوہر نے کہا کہ ہمیں بانی پی ٹی آئی سے ملنے نہیں دیا جارہا، ملاقات کیلئے آنیوالوں پر واٹر کینن کا استعمال کیا گیا، اگر احتجاج بیٹھنے والے مزید دو گھنٹے بیٹھے رہتے تو ملک اور قوم کا کیا نقصان ہو جاتا؟۔
انہوں نے کہا کہ یہ بہانہ لگا رہے ہیں کہ خان کی ٹوئٹ کی وجہ سے ملاقات نہیں ہو رہی، بشری بی بی کی فیملی پریس کانفرنسز کر رہی ہے ان کی ملاقاتیں کیوں نہیں کروا رہے؟، اس سب سے کچھ نہیں ہوگا۔
انہوں نے کہا کہ گزشتہ روز صوبائی اسمبلی میں ایک قرار داد منظور ہوئی، آپ اس مرتبہ فیڈریشن کے یونٹس کو ایک دوسرے کیخلاف کھڑا کر رہے ہیں، کیا آپ پی ٹی آئی پر بین لگانے جا رہے ہیں؟ ابھی تک تو اپ نے سرٹیفکیٹ ہی نہیں قبول کیا، اگر یہی حالات رہے تو حالات پھر کنٹرول میں نہیں آئینگے۔
بیرسٹر گوہر نے کہا کہ یہ کاروباری دنیا نہیں کہ 2 میں سے 1 مائنس کرو تو ایک رہ جائے گا، اگر ایک مائنس ہوا تو اس کے بعد ایک بھی باقی نہیں رہے گا۔
انہوں نے کہا کہ ہم اس وقت تین کروڑ عوام کی نمائندگی کر رہے ہیں، ہم سسٹم کا حصہ اس لئے ہیں تاکہ ملک میں جمہوریت برقرار رہے۔
