راجستھان میں درج ایک بڑے مالیاتی دھوکہ دہی کے مقدمے میں معروف بھارتی فلمساز وکرم بھٹ اور انکی اہلیہ شویتا مبری بھٹ کو ممبئی سے گرفتار کر لیا گیا ہے۔
غیر ملکی میڈیا کے مطابق ادے پور پولیس کی خصوصی ٹیم نے فلمساز اور انکی اہلیہ کو حراست میں لیکر عدالت سے 9 دسمبر تک کا ٹرانزٹ ریمانڈ حاصل کر لیا ہے، وکرم بھٹ، انکی اہلیہ اور 6 دیگر افراد پر ادے پور کے ڈاکٹر انڈیرا گروپ آف کمپنیز کے بانی اجے مردیا کو تقریباً 30 کروڑ روپے کے فراڈ کا نشانہ بنانے کا الزام گیا ہے، ڈاکٹر مردیا نے دعویٰ کیا ہے کہ ان سے انکی مرحومہ اہلیہ کی زندگی پر مبنی بائیوپک اور دیگر فلموں کی تیاری کے نام پر منافع کے بڑے دعوے کر کے رقم لی گئی لیکن منصوبے مکمل نہیں کئے گئے۔
پولیس کے مطابق مئی 2024 میں مردیا اور بھٹ خاندان کے درمیان 4 فلموں کی تیاری کا معاہدہ ہوا تھا جس کی مجموعی مالیت 47 کروڑ روپے تھی۔
ابتدائی دو منصوبے مکمل ہونے کا دعویٰ کیا گیا تاہم باقی فلمیں نہ بن سکیں، تفتیش سے پتہ چلاہے کہ مبینہ طور پر جعلی وینڈرز کے نام پر فرضی بل اور بڑھا چڑھا کر تیار کی گئی دستاویزات کے ذریعے رقم نکلوائی گئی جس سے شکایت کنندہ کو تقریباً 30 کروڑ روپے کا نقصان ہوا۔
میڈیا کا کہنا ہے کہ گرفتاری کے بعد عدالت میں پیشی کے دوران جوڑے کے وکلا نے عدالت میں موقف اختیار کیا کہ پولیس نے بغیر مناسب طریقہ کار کے گرفتار کیا اور ملزمان پر دبائو ڈال کر خالی تاریخ اور وقت کے بغیر ایک دستاویز پر دستخط بھی کروائے، فلمساز کے وکلا نے الزام لگایا ہے کہ پولیس نے دھمکی دی تھی کہ تعاون نہ کرنے پر راجستھان میں تشدد کیا جائیگا، عدالت نے فریقین کے دلائل سننے کے بعد وکرم بھٹ اور انکی اہلیہ کا ٹرانزٹ ریمانڈ 9 دسمبر تک منظور کر لیا ہے۔
