جماعت اسلامی نے پیپلز پارٹی پر الزام لگاتے ہوئے کہا کہ صوبہ کی حکمران جماعت کی 17 سال کی کرپشن نے شہر کو تباہ حال کر دیاہے، شہر کا انفرااسٹرکچر تباہ حال ہے، پیپلز پارٹی کراچی والوں کو نہ بلدیاتی اداروں کو اختیار دیتی ہے، 18ویں ترمیم کے بعد بھی وسائل دینے کو تیار نہیں، یہ ہے انکی جمہوریت، صوبائی بجٹ 18ویں ترمیم کے بعد 8 گناہ بڑھ گیا ہے، کراچی کو 2018 میں بھی اتنے ہی پیسے ملتے تھے جتنے آج۔
جماعت اسلامی کراچی کے امیر منعم ظفر نے پریس کانفرنس کرتے ہوئے کہا شہری حادثات کا شکار ہیں، واٹر کارپوریشن کا حال بھی سامنے ہے، ہم نے 2 سال میں 9 ٹائونز میں اپنی مدد آپکے تحت ہزاروں مین ہول پر ڈھکن لگائے، پورے شہر کا حال گٹر جیسا ہو گیا ہے، حکمران شہریوں کی کوئی بات نہیں سنتے، کریم آباد انڈر پاس تاحال مکمل نہیں ہوا، ملیر چوک سے ٹینک چوک تک سڑک تباہ حال ہے، کوئی شہر کا پرسان حال نہیں، جہانگیر روڈ مرتضی وہاب پر کلنک کا ٹیکا ہے، انڈر پاس کے نام پر گلستان جوہر پر لوگوں کو پریشان کیا ہوا ہے، صوبائی حکومت کے صرف دعوے نظر آتے ہیں، میئر کراچی کے ترقیاتی کام کے 60 دن کب شروع ہونگے، کے الیکٹرک بلوں میں ٹیکس لگا کر اب تک 4 ارب سے زائد وصول کر چکے ہیں، واٹر کارپوریشن مرتضیٰ وہاب کے ماتحت ہے اس سال 24 افراد گٹر میں گر کر جاں بحق ہوئے ہیں، شہر میں بسوں کے اعلانات ہیں کب آئیں گی یہ بسیں، 3 سو بسیں ہیں 100 بی آر ٹی کی بھی ملا لیں، ساڑھے 3 کروڑ کی آبادی ہے۔
انہوں نے کہا کہ کراچی میں ٹریفک حادثات روز کا معمول بن گیا ہے، شرجیل میمن کی جانب سے ہر چند روز میں اعلانات کئے جاتے ہیں، مرتضیٰ وہاب کے 60 دن مکمل ہو رہے ہیں نہ شرجیل میمن کا ہفتہ، موٹر سائیکل پر لاکھوں لوگ سفر کرتے ہیں، 250 سے زائد واقعات میں ہیوی ٹریفک سے لوگ کچل دئیے گئے۔
