ڈی آئی خان: وزیر اعلیٰ خیبر پختونخوا علی امین گنڈاپور نے امن وامان کو صوبے کا بڑا مسئلہ قرار دیتے ہوئے کہا ہے کہ ترقیاتی کاموں کی نگرانی خود کروں گا، تنقید کی بجائے عملی کام کیا جائے، اپنے فائدے کیلئے دوسروں کو نقصان نہ پہنچائیں، عوام بجلی چوری سے پرہیز کریں ورنہ لوڈشیڈنگ ہوگی۔تفصیلات کے مطابق سرکٹ ہاؤس ڈی آئی خان میں ترقیاتی منصوبوں کی افتتاحی تقریب سے خطاب کرتے ہوئے وزیراعلی خیبرپختونخوا علی امین گنڈا پور نے کہا کہ صوبے کے وسائل بروئے کار لا رہے ہیں، ہسپتالوں میں بنیادی سہولیات کی فراہمی ممکن بنائی جا رہی ہے، صوبے میں منشیات فروشوں کا پرائیویٹ ہسپتالوں میں مفت علاج ہو رہا ہے۔
انہوں نے کہا کہ میں صوبے کا وزیراعلیٰ ہوں لیکن ڈی آئی خان کو اپنا حق ملے گا، یہ آپ کے ٹیکس کا پیسہ ہے عوام پر کوئی احسان نہیں ہے، میں کسی پراجیکٹ کا افتتاح نہیں کرتا،ایک فلائی اوور کا افتتاح کیا جو ابھی تک نہیں بنا۔انہوں نے کہا کہ علاقے میں جو ترقیاتی کام ہو رہا ہے عوام اس کا کام چیک کریں، آپ نے ترقیاتی کاموں کی چوکیداری کرنی ہے، آپ نشاندہی کریں ہم کام کریں گے، تنقید کرنے کی بجائے عملی کام کیا جائے، اپنے فائدے کیلئے دوسرے کو نقصان نہ پہنچائیں۔
انہوں نے کہا کہ صوبے کے عوام کو کہتا ہوں آپ حکومت کی ٹیم بنیں، ہم نے معاشرے میں شعور لانا ہے، محکمے اور ادارے آپ کے غلام، خدمت کے خواہشمند ہیں۔
انہوں نے کہا کہ صوبے کے ترقیاتی کاموں کی نگرانی خود کروں گا، بانی پی ٹی آئی کے وژن کے مطابق کام کریں گے انہوں نے کہا کہ امن وامان صوبے کا بڑا مسئلہ ہے، سیکیورٹی فورسز کی قربانیاں رائیگاں نہیں جائیں گی،ہمارے آباؤ اجداد سمیت لوگوں نے صوبے میں بڑی قربانیاں دی ہیں۔
انہوں نے کہابجلی اور لوڈشیڈنگ صوبے کا کام نہیں، بجلی چوری سے پرہیز کیا جائے، چوری کریں گے تو لوڈشیڈنگ ہوگی۔ انہوں نے کہا کہ صوبے نے اپنے حصہ کا آئی ایم ایف کو پورا پیسہ دیا ہے، ہم اپنے وسائل بڑھانے کیلئے کام کر رہے ہیں۔
