اسرائیلی فورسز نے غزہ اور لبنان میں جارحیت کا سلسلہ مزید تیز کردیا ہے اور جنگ بندی معاہدے کی خلاف ورزی کرتے ہوئے قابض صیہونی فوج نے رہائشی علاقوں کو نشانہ بنایا ہے۔
غیر ملکی میڈیا کے مطابق تازہ اسرائیلی کارروائیوں میں 7 فلسطینی شہید ہوگئے ہیں جبکہ 4 عمارتیں بھی تباہ ہوگئی ہیں۔
فلسطینی حکام کے مطابق اسرائیلی فوج نے رفح سمیت مختلف آبادیوں میں کارروائیاں کرتے ہوئے شہریوں کو نشانہ بنایا۔
ادھر اسرائیلی فوج نے دعویٰ کیا ہے کہ رفح میں کارروائی کے دوران حماس کے ایک کمانڈر کو بھی مارا گیا ہے، غزہ میں فوجی کارروائیاں پوری طاقت سے جاری رہیں گی۔
فلسطینی وزارتِ صحت کے مطابق جنگ بندی معاہدے کے بعد سے اب تک 360 فلسطینی شہید اور 900 سے زائد زخمی ہوچکے ہیں جبکہ غزہ جنگ کے آغاز سے اب تک مجموعی اموات 70 ہزار سے تجاوز کرچکی ہیں۔
ادھر اسرائیلی فوج نے لبنان کے جنوبی علاقوں میں بھی بمباری کی ہے جس سے 4 رہائشی عمارتیں مکمل طور پر تباہ ہوگئیں، اسرائیلی فورسز نے دعویٰ کیا ہے کہ ان حملوں میں حزب اللہ کے اسلحہ گوداموں کو نشانہ بنایا گیا۔
