واشنگٹن(شِنہوا)امریکی وزیر خارجہ مارکو روبیو اور خصوصی صدارتی ایلچی سٹیو وٹکوف نے فلوریڈا کے شہر ہیلینڈیل بیچ میں یوکرینی وفد کے ساتھ بات چیت کی، کیونکہ واشنگٹن یوکرین بحران کے خاتمے کے لئے ترمیم شدہ امن منصوبے کو آگے بڑھا رہا ہے۔
روبیو نے ملاقات سے قبل اپنے مختصر بیان میں کہا کہ حتمی مقصد ظاہر ہے صرف جنگ کا خاتمہ نہیں ہے بلکہ اس بات کو یقینی بنانا بھی ہے کہ جنگ کا اختتام یوکرین کو خودمختار اور آزاد چھوڑے اور اسے حقیقی خوشحالی کا موقع فراہم کرے۔
یوکرینی وفد کے سربراہ رستم عمروف نے کہا کہ دونوں فریق یوکرین کے مستقبل، سلامتی، دوبارہ جارحیت نہ ہونے کی یقین دہانی، خوشحالی اور تعمیر نو کے طریقہ کار پر بات چیت کر رہے ہیں۔
ہفتے کے روز یوکرینی صدر وولودیمیر زیلنسکی نے ایکس پر کہا کہ یوکرینی وفد جنگ کے خاتمے کے لئے درکار اقدامات پر تیزی اور بامعنی انداز میں کام کرے گا۔
زیلنسکی نے کہا کہ آنے والے دنوں میں یہ ممکن ہے کہ ان اقدامات کو واضح کیا جائے جن کے ذریعے جنگ کو باوقار انداز میں ختم کیا جا سکے۔
ادھر امریکی صدر ڈونلڈ ٹرمپ نے کہا ہے کہ وہ اپنے روسی اور یوکرینی ہم منصبوں سے تبھی ملیں گے جب امن معاہدہ حتمی شکل اختیار کر چکا ہو یا اپنے آخری مراحل میں ہو۔
