وزیراعظم شہباز شریف نے عوامی صحت کیلئے ایڈز جیسے خطرات کے خاتمے کیلئے اقدامات جاری، بیماری سے تحفظ کی سہولیات تمام شہریوں تک پہنچانے کے عزم کا اعادہ کیا ہے۔
ایڈزکے عالمی دن پر جاری بیان میں وزیراعظم نے کہا کہ رواں سال یہ دن رکاوٹوں کو عبور کرنا اور ایڈز کی طرف برتا کو تبدیل کرنے کے عنوان کے تحت منایا جا رہا ہے۔
انہوں نے کہا کہ یہ عنوان نئے اٹھنے والی مشکلات سے نئے عزم کے ساتھ نبرد آزما ہونے کی اہمیت کو اجاگر کرتا اور یاد دلاتا ہے کہ رکاوٹوں، بیماریوں، مشکلات اور سماجی عدم مساوات کے باوجود تمام شہریوں کی صحت اور عزت و وقار کے تحفظ کیلئے ہمارا عزم غیر متزلزل ہونا چاہئے۔
انہوں نے کہا کہ ایچ آئی وی کی وباء جہاں دنیا بھر میں نظام صحت کی افادیت اور موثر کارکردگی کا امتحان لے رہی ہے، وہیں یہ ہمیں اس بیماری سے مقابلہ کرنے اور نظام صحت کو مزید موثر بنانے کیلئے جامع حکمت عملی بنانے کی یاد دہانی بھی کراتی ہے۔
وزیراعظم نے کہا کہ اس بیماری کی طرف عوامی رد عمل اور رویہ کو تبدیل کرنا نہایت ضروری ہے،اس تناظر میں علاج کی فراہمی کو یقینی بنانے، جدید سہولتوں کو اپنانے اور معاشرتی سطح پر باہمی تعاون کو بڑھاتے ہوئے تمام طبقات تک پہنچنے سے عوامی سطح پر اس بیماری کی طرف رد عمل کو تبدیل کیا جا سکتا ہے۔
انہوں نے کہا کہ حکومتی توجہ جہاں نظام صحت کو موثر اور افادیت کو بڑھانے اور عوام تک اس کی رسائی کو یقینی بنانے پر مرکوز ہے، وہیں ایچ آئی وی سے متاثرہ افراد کی آواز کو توجہ دینا بھی نا گزیر ہے۔
وزیر اعظم نے کہا کہ صحت کا تحفظ بنیادی شہری حقوق میں شامل ہے، تمام شہری بالخصوص کمزور اور محروم طبقات تک بیماری کی روک تھام، تشخیص، علاج و نگہداشت کی مساوی سہولیات فراہم کرنا حکومت کی ترجیحات میں شامل ہے۔انہوں نے کہا کہ وفاقی حکومت صوبائی حکومتوں سے تعاون کیساتھ مقامی سطح پر بھی اقدامات کو بار آور کرنے کیلئے پرعزم ہے، معاشرے میں اس بیماری سے وابستہ بدنامی اور متاثرہ افراد سے امتیازی سلوک کے خاتمے کیلئے اجتماعی کاوش وقت کی اہم ضرورت ہے۔
انہوں نے کہا کہ مجموعی طور پر انسان دوست رویہ، نظام صحت کی جدت اور بہتری کیلئے سرمایہ کاری سے ہی ہم ایچ آئی وی کی طرف اپنے ردِ عمل کو مضبوط، جامع اور موثر بنا سکتے ہیں۔
وزیراعظم نے کہا کہ صحت کے شعبے اور بالخصوص ایڈز کے علاج میں ترقی کے باوجود اس کی عوامی سطح پر تشخیص، علاج تک رسائی اورعوامی آگاہی کے حوالے سے ابھی کام کرنے کی بہت گنجائش موجود ہیں۔
وزیراعظم نے کہا کہ ہمیں اجتماعی طور پر ان چیلنجز کا ہمدردانہ اور سنجیدہ رویہ کیساتھ مقابلہ کرنا ہوگا، ایڈز کے خاتمے کے لئے ترجیحی بنیادوں پر کئے جانے والے اقدامات میں خطرے سے دوچار طبقات کی علاج تک رسائی، صنفی امتیازی سلوک کا خاتمہ، بچوں میں والدین سے ایچ آئی وی کی منتقلی کی روک تھام، مریضوں کے لئے محفوظ خون کی فراہمی اور منشیات استعمال کرنے والے افراد میں اس کے پھیلائو میں کمی لانا شامل ہے۔
انہوں نے کہاکہ اجتماعی قومی و سیاسی عزم، شعبہ جاتی باہمی تعاون اور مشترکہ ذمہ داری کے ذریعے ہی موجودہ رکاوٹوں پر قابو پاکر ہی ایڈز کے خاتمے کی جانب پیش رفت کو تیز کیا جا سکتا ہے۔
وزیراعظم نے کہا کہ آئیے ایڈز کے عالمی دن پر تجدید عہد کریں کہ کوئی بھی سماجی، معاشرتی، معاشی یا انتظامی رکاوٹ اس بیماری کے خلاف ہماری جنگ کی راہ میں حائل نہیں ہوگی اور ہم مل کر ایڈز سے مقابلہ کی حکمت عملی کو جامع اورمزید موثر بنائیں گے۔
