بھارتی پولیس نے مذہب و نام تبدیل کرکے گرفتاری سے بچنے کی کوشش کرنیوالا قاتل 36 سال بعد گرفتار کرلیا۔
بھارتی میڈیا کے مطابق اتر پردیش سے تعلق رکھنے والا سزا یافتہ مجرم پردیپ سکسینہ 1989ء میں پیرول پر رہائی کے بعد فرار ہوگیا تھا جس کے بعد اس نے اپنا نام، شناخت اور مذہب تبدیل کرلیا۔
حکام کے مطابق بھائی کے قاتل مجرم نے اپنا نام عبدالرحیم رکھ کر داڑھی رکھ لی اور بطور ڈرائیور کام شروع کردیا۔
پولیس کے مطابق حال ہی میں الہ آباد ہائیکورٹ کے حکم پر پولیس نے پرانے مقدمے کی فائلیں کھولیں تو سکسینہ کی گرفتاری کیلئے خصوصی ٹیم تشکیل دی گئی، تحقیقات کے دوران اہلکاروں کو معلوم ہوا کہ وہ مذہب اور نام تبدیل کر کے برسوں سے مراد آباد میں رہ رہا ہے اور کچھ عرصہ قبل کسی کام کے سلسلے میں خاموشی سے بریلی بھی آیا تھا جس پر پولیس نے کارروائی کرتے ہوئے مجرم کو گرفتار کر کے عدالت کے سامنے پیش کردیا۔
