پنجاب حکومت نے ٹریفک قوانین میں اصلاحات کرتے ہوئے بار بار چالان ہونیوالی گاڑیوں کو نیلام کرنے کا فیصلہ کرلیا جبکہ ون وے کی خلاف ورزی ختم کرنے کیلئے 30 دن کی مہلت فراہم کردی گئی۔
ذرائع کے مطابق پنجاب میں 60 سالہ پرانے ٹریفک ایکٹ میں 20بڑی اصلاحات کی گئی ہیں۔
اصلاحات کے مطابق اب پنجاب میں کسی بھی گاڑی کا بار بار چالان ہوگا تو اسے نیلام کردیا جائیگا، سرکاری گاڑی قانون سے بالاتر نہیں ہوگی، قوانین کی خلاف ورزی کرنے والی سرکاری گاڑیوں کو بھاری جرمانہ ہوگا۔
پنجاب میں ون وے کی خلاف ورزی ختم کرنے کیلئے 30دن کی مہلت دی گئی ہے جبکہ یوٹرن کی ری ماڈلنگ سے سڑکیں محفوظ اور منظم بنائی جائیں گی۔
حادثات میں جاں بحق افراد کے اہل خانہ کو دیت فوری طور پر فراہم کرنے پر اتفاق کیا گیا ہے، میرج ہالز کو پارکنگ کا انتظام کرنے کی ہدایت کی گئی ہے، مناسب پارکنگ نہ ہونے پر میرج ہال ختم کردیا جائیگا۔
پنجاب میں کم عمر بچوں کی ڈرائیونگ ختم کرنے کیلئے سخت فیصلہ کن کریک ڈائون کا فیصلہ کیا گیاہے ۔انڈر ایج ڈرائیونگ کی صورت میں گاڑی کے مالک کو 6 ماہ تک قید بھی ہوسکتی ہے۔
پنجاب بھر میں بس کی چھت پر سواریاں نہیں بٹھائی جاسکیں گی، ٹریفک کی بہتری اور شہری حفاظت کیلئے لاہور کی پانچ ماڈل سڑکوں پر چنگ چی رکشوں پر مکمل پابندی عائد ہوگی۔
اس حوالے سے جاری بیان میں وزیراعلی مریم نوازنے کہاہے کہ دوسرے شہر جانے والی گاڑی کو تیز رفتاری سے جلد پہنچنے پر کارروائی کا سامنا کرنا پڑے گا، لاہورسمیت تمام شہروں میں ٹریفک کے معاملات کو بہتر کرنا پڑے گا، خلاف ورزی پر کوئی امتیاز رکھے بغیر ہر شخص کو جرمانے کی ادائیگی کرنا پڑے گی۔
