اسلام آباد: وزارت خزانہ نے قومی اسمبلی کو بتایا ہے کہ پاکستان رواں سال قرض کی مد میں 18 ہزار 700ارب ادا کرے گا۔ تفصیلات کے مطابق وزارت خزانہ نے رواں سال جون تک ملکی و غیر ملکی قرضوں کی تفصیلات قومی اسمبلی میں پیش کردیں۔
رپورٹ کے مطابق رواں سال جون تک ملکی قرض 71 ہزار ارب تھا جس میں 47 ہزار ارب سے زائد ملکی اور 24ارب سے زائد غیر ملکی قرضہ شامل ہے، اس طرح مجموعی قرضے کا 66 فیصد ملکی اور 34 فیصد غیر ملکی قرضوں پر مشتمل ہے۔
رپورٹ کے مطابق ملکی قرضہ حکومتی سیکیورٹی کے اجراء، بیرونی قرضہ، ترقیاتی شراکت داروں اور کمرشل اداروں سے حاصل کیا جا رہا ہے۔وزارت خزانہ کے 2024ء سے 2040ء تک قرض ادائیگی شیڈول کے مطابق رواں سال 2024ء میں 18 ہزار 700 ارب اور 2025ء میں 8 ہزار 700 ارب قرض کی ادائیگی کی جائے گی جبکہ 2026ء میں 7 ہزار 600 اور 2027ء میں 4 ہزار 300 ارب،2028ء میں 6 ہزار، 2029ء میں 8ہزار 400 ارب 2030ء میں 2 ہزار 400، 2031ء میں 2 ہزار 600 اور 2031 میں 1 ہزار ارب سے زائد سرکاری قرض کی ادائیگی کی جائے گی۔
