کوئٹہ: وزیراعظم شہباز شریف نے کہاہے کہ اجتماعی کوششوں،آرمی چیف کی لیڈر شپ میں ملک سے دہشت گردی ختم کریں گے، دہشت گردی واقعات میں شہید جوانوں، افسران کی قربانیاں رائیگاں نہیں جانے دیں گے، بلوچستان کی ترقی میں حائل رکاوٹیں دور کی جائیں گی۔
تفصیلات کے مطابق کوئٹہ میں صوبائی ایپکس کمیٹی اجلاس میں اظہار خیال کرتے ہوئے وزیراعظم شہباز شریف نے کہا کہ بلوچستان میں 26 اگست کو انتہائی دلخراش واقعہ ہوا، دہشتگردی کے واقعات میں معصوم جانوں کے ضیاع پر سب غمزدہ ہیں۔ انہوں نے کہا کہ بلوچستان پاکستان کا خوبصورت صوبہ ہے، انفرادی قوت اور مصمم ارادے کیساتھ صوبے میں دہشتگردی کا مکمل خاتمہ کرنا ہوگا، بلوچستان کی ترقی و خوشحالی کی راہ میں حائل رکاوٹیں دور کی جائیں گی۔
انہوں نے کہا کہ خارجیوں اور دہشتگردوں نے مل کر بلوچستان میں دہشت گردی کا منصوبہ بنایا، بدقسمتی سے دہشت گردی نے 2018ء کے بعد دوبارہ سر اٹھایا ہے جسے پوری قوت سے کچلیں گے۔ انہوں نے کہا کہ آرمی چیف کی لیڈر شپ میں دہشت گردی کو ختم کریں گے، پاکستان جلد دوبارہ اپنا مقام حاصل کرے گا اور ہم ترقی کی راہ پر رواں دواں ہوں گے۔
انہوں نے کہا کہ دہشت گردی اقعات میں شہید ہونیوالے پاک فوج کے جوانوں اور افسروں کی قربانیوں کو رائیگاں نہیں جانے دیا جائے گا، اجتماعی کاوش کے ساتھ دہشت گردی کا خاتمہ کیا جائے گا۔
