ترجمان پاک فوج لیفٹیننٹ جنرل احمد شریف چودھری نے قائداعظم یونیورسٹی اسلام آباد کے اساتذہ اور طلباء کیساتھ خصوصی نشست کی جس میں ملکی سلامتی، داخلی صورتحال، دفاعی امور اور فوج کے پیشہ ورانہ کردار پر تفصیلی گفتگو کی گئی۔
ذرائع کے مطابق نشست کے دوران ڈی جی آئی ایس پی آر نے طلباء کو سوشل میڈیا پر جاری پروپیگنڈا، مس انفارمیشن اور اس کے اصل حقائق سے آگاہ کرتے ہوئے مختلف سوالات کے مدلل جوابات دیئے۔
خصوصی نشست میں شریک اساتذہ و طلبا نے ڈی جی آئی ایس پی آر کے سیشن کو انتہائی مفید اور موثر قرار دیا۔
اساتذہ نے کہا ہم پنجابی، پٹھان، سندھی یا بلوچ نہیں سب سے پہلے پاکستانی ہیں۔
وائس چانسلر قائداعظم یونیورسٹی نے کہا کہ بھارت کے حوالے سے ڈی جی آئی ایس پی آر نے کہا تھا کہ ہمارے جواب کو دنیا دیکھے گی اور دنیا نے مسلح افواج کے جواب کو بخوبی دیکھا، افواجِ پاکستان نے صرف بھارت اور اس کی فوج کو نہیں بلکہ اس کی ٹیکنالوجی کو بھی شکست دی۔
انہوں نے کہا کہ آج کا سیشن انتہائی معلوماتی تھا، طلبا کے کئی ابہام دور ہو گئے۔
طلباء نے بھی افواج پاکستان پر بھرپور اعتماد کا اظہار کرتے ہوئے کہا کہ ہم پاکستانی ہیں، پاک آرمی ہم میں سے ہے، ہم اپنی مسلح افواج کے ساتھ کھڑے اور انہیں سلام پیش کرتے ہیں، آج کے سیشن سے ہم نے بہت کچھ سیکھا ہے۔
