39 سالہ امریکی گلوکارہ و اداکارہ لیڈی گاگا نے انکشاف کیا ہے کہ کیریئر کی بلندیوں کے دوران میں ذہنی طور پر انتہائی غیر مستحکم تھیں، ایک حالیہ گفتگو میں اپنے زندگی کے اس مشکل مرحلے کو یاد کرتے ہوئے انہوں نے کہا کہ کیریئر کے عروج پر وہ ایک شدید ذہنی صحت کے بحران سے گزر رہیں تھیں، اب میں کہیں زیادہ مستحکم اور بہتر حالت میں ہوں اور اسکا کریڈٹ میں تھیراپی اور اپنے منگیتر کی بھرپور سپورٹ کو دیتی ہوں۔
غیر ملکی میڈیا کے مطابق لیڈی گاگا کو اپنے حالیہ ٹور کے دوران شدید گھبراہٹ کے دورے پڑے جس کے باعث انہیں ورلڈ ٹور منسوخ کرنا پڑا اور فوری طور پر طبی مدد حاصل کرنی پڑی۔
لیڈی گاگا کا کہنا تھا کہ ایک موقع پر مجھے نفسیاتی علاج کیلئے ہسپتال بھی جانا پڑا مجھے بریک کی ضرورت تھی میں کچھ بھی نہیں کر پا رہی تھی، میں بالکل ٹوٹ گئی تھی یہ بہت خوفناک تھا، ایک وقت ایسا بھی آیا جب مجھے نہیں لگتا تھا کہ میں کبھی بہتر ہو سکوں گی، میں خود کو زندہ ہونے پر بہت خوش قسمت سمجھتی ہوں۔
انہوں نے کہا کہ میری خراب ذہنی صحت نے میرے کیریئر کو بھی متاثر کیا جب میں سٹیج پر میوزک کیساتھ اپنے چاہنے والوں کے درمیان ہوتی تھی تو محض 90 سیکنڈز کیلئے مجھے خود کو گھبراہٹ کے دورے سے بچانے کیلئے مسلسل ذہنی طور پر سمجھانا پڑتا تھا۔
