وزیراعلی خیبر پختونخوا سہیل آفریدی نے بین الصوبائی ہم آہنگی کی ضرورت پر زور دیتے ہوئے کہا ہے کہ کسی صوبے کو خوراک و اجناس کی ترسیل روکنے کا اختیار نہیں، سیاسی اختلافات اپنی جگہ مگر عوام کے رزق پر سیاست نہیں ہونی چاہئے۔
بدھ کو سینیٹ قائمہ کمیٹی برائے بین الصوبائی رابطہ کے وفد نے سہیل آفریدی سے ملاقات کی اور وزیر اعلی کا منصب سنبھالنے پر مبارکباد پیش کی۔
وفد میں سینیٹر دلاور خان، محسن عزیز، نسیمہ احسان، ناصر محمود، ہدایت اللہ خان، نیاز احمد اور مصدق مسعود سمیت دیگر ارکان شریک تھے اس موقع پر مشیر خزانہ مزمل اسلم، سیکرٹری خوراک شاہ محمود اور دیگر حکام بھی موجود تھے۔
ملاقات میں پنجاب حکومت کی جانب سے گندم کی آزاد نقل و حرکت پر پابندیوں کا معاملہ زیر غور آیا۔
وزیراعلی سہیل آفریدی نے کہا کہ آرٹیکل 151 کے تحت بین الصوبائی تجارت تمام صوبوں کا آئینی حق ہے، کسی صوبے کو خوراک اور اجناس کی ترسیل روکنے کا کوئی اختیار نہیں، سیاسی اختلافات اپنی جگہ مگر عوام کے رزق پر سیاست نہیں ہونی چاہئے۔
انہوں نے وفد کو خیبر پختونخوا کے عوام کا سفیر قرار دیتے ہوئے کہا کہ گندم کے مسئلے کے حل کیلئے بین الصوبائی ہم آہنگی ضروری ہے۔
