وزیراعظم شہباز شریف نے بابا گرونانک کے 556 ویں یوم ولادت پر سکھ برادری کو مبارکباد پیش کرتے ہوئے کہا ہے کہ بابا گرو نانک دیو جی کی تعلیمات امن، رواداری اور انسانیت کا درس دیتی ہیں، حکومت تمام مذہبی اقلیتوں کے حقوق کے تحفظ کیلئے پرعزم ہے۔
جاری بیان میں وزیر اعظم نے کہا کہ بابا گرو نانک دیو جی کا شمار نہ صرف سکھوں کے اکابرین میں ہوتا ہے بلکہ وہ ایک ایسے نظریاتی آدمی تھے جنہوں نیساری انسانیت کیلئے امن و برابری اور تحمل و برداشت کو فروغ دینے کا درس دیا۔
انہوں نے کہا کہ بابا گرو نانک کی دائمی تعلیمات بشمول انسانیت سے محبت، بے لوث خدمت، بین المذاہب ہم آہنگی نسلوں کو رہنمائی فراہم کر رہی ہیں، ان کا اتحاد و یگانگت اور رواداری کا پیغام ایک پرامن اور انصاف پسند دنیا کو قائم کرنے کیلئے مشعل راہ ہے۔
انہوں نے کہا کہ پاکستان کیلئے یہ باعث فخر ہے کہ پاکستان بابا گرو نانک دیو جی کی زندگی اور تعلیمات سے متعلقہ متعدد گرودواروں، بالخصوص گرودوارہ جنم آستان ننکانہ صاحب کی حفاظت کر رہا ہے۔
انہوں نے کہا کہ حکومت پاکستان تمام مذہبی اقلیتوں کے حقوق کی حفاظت کا غیر متزلزل عزم رکھتی ہے،اسی عزم کے مطابق حکومت ان تمام مذہبی مقامات کی حفاظت اور خراج عقیدت کیلئے آنے والے زائرین کی رسائی میں ہر طرح کی سہولت بہم پہنچا رہی ہے۔
وزیراعظم نے کہا کہ پاکستان ہر سال دنیا بھر سے نے والے سکھ یاتریوں کو مقدس مقامات پر خوش آمدید کہتا اور ہر ممکن سہولیات فراہم کرتا ہے۔
انہوں نے کہا کہ آئیے اس پر مسرت دن کو مناتے ہوئے بابا گرو نانک کے امن و رواداری اور باہمی ہم آہنگی کے پیغامات سے سبق حاصل کر کے دنیا کو اتحاد و یگانگت، باہمی عزت اور امن کا گہوارہ بنائیں۔
