اسلام آباد: وزیراعظم کے مشیر برائے سیاسی امور رانا ثناء اللہ نے کہا ہے کہ بلوچستان میں دہشت گردی کے پیچھے دشمن ممالک ہیں،حملے پلاننگ کے تحت کئے گئے، دہشت گردوں کی اتنی قوت نہیں کہ رٹ قائم کرسکیں،پی ٹی آئی حقیقت ہے سیاسی جماعت نہیں، بانی پی ٹی آئی کی سیاست میں موجود خلل حل ہونا چاہئے، پیپلز پارٹی، (ن) لیگ میں کوئی فائرنگ نہیں ہوئی، سیاسی جماعتیں، کارکن بیان نہ دیں تو پھر کیا کریں۔
تفصیلات کے مطابق میڈیاسے گفتگو کرتے ہوئے مشیر وزیراعظم برائے سیاسی امور رانا ثناء اللہ نے کہا ہے کہ بلوچستان میں دہشتگردی کے پیچھے وہ ممالک ہیں جنہوں نے گزشتہ 75 سالوں سے ہمارے ملک کے وجود کو تسلیم ہی نہیں کیا، اس دہشتگردی کا اسی انداز سے مقابلہ اور قلع قمع ہونا چاہئے جس طرح دیگر دہشتگرد تنظیموں کے خلاف ہوا ہے۔
انہوں نے کہا کہ دہشت گردوں نے منظم ہوکر پروگرام بناکر ایک دن میں تین چار واقعات کئے، دہشتگردوں کی نہ اتنی تعداد ہے نہ اتنی قوت، ان کی رٹ قائم نہیں ہوسکتی، ہماری فورسز میں اتنی اہلیت ہے کہ دہشتگردوں کا خاتمہ کر سکتے ہیں۔
انہوں نے کہا کہ دہشت گرد کبھی کبھار چھپ کر کوئی بس روکتے ہیں اور ایسا واقعہ کرتے ہیں، ہمیں اپنی فورسز کی حوصلہ افزائی کرنی چاہئے۔ انہوں نے کہا کہ دہشت گردجب موقع ملتا ہے ہ ٹولیوں کی صورت میں ایسے واقعات کردیتے ہیں۔
انہوں نے کہاکہ پیپلز پارٹی کے ساتھ کسی بھی وقت بیٹھا جاسکتا ہے، تاہم عمران خان کسی کے ساتھ بات کرنے کو تیارہیں نہ بیٹھنے کو۔انہوں نے کہا کہ جب عمران خان اقتدار میں تھے تو کہتے تھے کسی کو نہیں چھوڑوں گا، اب کہتے ہیں میں نہیں تو پاکستان نہیں، ان کی سیاست میں ایسا خلل ہے جس کو حل ہونا چاہئے، باقی کوئی سیاسی جماعت ایسی نہیں جو ایک دوسرے کے ساتھ بیٹھ کر معاملات حل نہ کرسکے۔
انہوں نے کہا کہ پی ٹی آئی ایک حقیقت ہے سیاسی جماعت نہیں۔ انہوں نے کہا کہ پیپلز پارٹی اور مسلم لیگ کے درمیان کوئی فائرنگ نہیں ہوئی، سیاسی جماعتیں اور کارکن بیان نہ دیں تو پھر کیا کریں گے، سیاسی بیان بازی ہوتی رہنی چاہئے۔
