پاکستان نے غزہ میں اسرائیلی حملوں اور امن معاہدے کی خلاف ورزی کی شدید الفاظ میں مذمت کرتے ہوئے عالمی برادری سے اسرائیلی افواج کو جارحیت سے روکنے کیلئے کردار ادا کرنے کا مطالبہ کیا ہے۔
دفتر خارجہ کی جانب سے جاری بیان میں کہا گیا ہے کہ اسرائیل کی یہ کارروائیاں عالمی قوانین اور حال ہی میں طے پانے والے امن معاہدے کی صریحا خلاف ورزی ہیں۔
بیان میں کہا گیا ہے کہ اسرائیلی افواج کے ایسے جارحانہ اقدامات خطے میں پائیدار امن و استحکام کیلئے جاری عالمی کوششوں کو نقصان پہنچا رہے ہیں۔
پاکستان نے مطالبہ کیا کہ عالمی برادری اسرائیلی قابض افواج کی جانب سے جنگ بندی معاہدے کی خلاف ورزیوں کو فوری طور پر رکوانے کیلئے موثر کردار ادا کرے۔
ترجمان کے مطابق پاکستان اپنے اصولی مو قف کہ فلسطین کو 1967 سے قبل کی سرحدوں کے مطابق ایک آزاد، خودمختار اور مستحکم ریاست کے طور پر قائم کیا جائے جس کا دارالحکومت القدس الشریف ہوکا اعادہ کرتا ہے ۔
