وفاقی وزیر صحت مصطفی کمال نے ملک سے پولیو کے خاتمے کے عزم کا اعادہ کرتے ہوئے کہا ہے کہ بیماری کے خاتمے کیلئے ہائی رسک اضلاع پر خصوصی توجہ دی جا رہی ہے، مذہبی و سماجی رہنمائوں کی مدد سے انکاری کیسز میں کمی آئی ہے۔
جاری بیان کے مطابق ریاض میں وزیر صحت سید مصطفی کمال نے چیئرمین پولیو اوورسائیٹ بورڈ ڈاکٹر کرس ایلس اور ڈبلیو ایچ او کے ریجنل ڈائریکٹر ڈاکٹر حنان بلخی سے ملاقاتیں کیں جن میں پولیو کے خاتمے کیلئے کئے جانے والے اقدامات پر تبادلہ خیال کیا گیا۔
ترجمان کے مطابق وفاقی وزیر نے ملک سے پولیو کے مکمل خاتمے کا عزم کا اعادہ کرتے ہوئے بتایا کہ انسدادِ پولیو مہم کی کامیابی کیلئے مربوط و موثر حکمت عملی تشکیل دی گئی ہے، ملک بھر میں اعلی معیار کی انسدادِ پولیو مہمات کا انعقاد کیا جا رہا ہے۔
انہوں نے بتایا کہ جنوبی خیبر پختونخوا اور کراچی سمیت ہائی رسک اضلاع پر خصوصی توجہ دی جا رہی ہے مذہبی اور سماجی رہنمائوں کی مدد سے انکاری کیسز میں نمایاں کمی آئی ہے۔
اس موقع پر چیئرمین پولیو اوورسائیٹ بورڈ ڈاکٹر کرس ایلس نے پولیو کیخلاف پاکستان کے اقدامات کو سراہتے ہوئے بیماری کے خاتمے کیلئے ہر سطح پر بھرپور تعاون جاری رکھنے کا عزم دہرایا۔
