صدر پاکستان ٹینس فیڈریشن اعصام الحق نے کہا ہے کہ کھلاڑیوں سے کئے تمام وعدے پورے کر رہے ہیں، اب صرف صاحب حیثیت نہیں، میرٹ پر کھلاڑی بیرون ملک جائیں گے۔
نجی ٹی وی سے گفتگو کرتے ہوئے صدر پاکستان ٹینس فیڈریشن اعصام الحق نے کہا کہ باتوں پر نہیں کام کرنے پر یقین رکھتا ہوں، جب کھیلتا تھا تب بھی باتیں کم اور ریکٹ کے ساتھ اپنا آپ دکھاتا تھا۔
انہوں نے بتایا کہ ہمیں 7 آئی ٹی ایف جونئیرٹورنامنٹ الاٹ ہوئے ہیں، اے ٹی پی ٹورچیلنجر پہلی بار ملا ہے، یہ کرکٹ میں آئی سی سی ایونٹ کی طرح ہے۔
انہوں نے بتایا کہ اس کے علاوہ 12نئے نیشنل ٹورنامنٹس شامل کئے گئے ہیں جبکہ انعامی رقم میں بھی اضافہ کیا گیا ہے۔ انہوں نے بتایا کہ ہم کھلاڑیوں سے کئے گئے تمام وعدے پورے کر رہے ہیں، جونئیر کھلاڑی بیرون ملک کھیلنے جا رہے ہیں جس میں میرٹ کو ترجیح دے رہے ہیں۔
انہوں نے کہا اب یہ نہیں ہو گا کہ جس کے پاس پیسے ہیں صرف وہی باہر کھیلنے جائیں۔
