اسلام آباد ہائیکورٹ نے وزیراعلی خیبرپختونخوا کی بانی پی ٹی آئی عمران خان سے ملاقات کی درخواست پر فریقین کو نوٹس جاری کردیئے۔
پیر کو اسلام آباد ہائیکورٹ میں جسٹس ارباب محمد طاہر نے درخواست پر رجسٹرار آفس کے اعتراضات کیساتھ سماعت کی۔
سہیل آفریدی کے وکیل علی بخاری ایڈووکیٹ نے موقف اپنایا کہ وزیراعلی خیبرپختونخوا کی بانی پی ٹی آئی سے جیل ملاقات کی پٹیشن پر رجسٹرار آفس نے متعدد اعتراضات عائد کر رکھے ہیں، اعتراض ہے کہ اس حوالے سے پہلے ہی ایک عدالتی فیصلہ آچکا ہے، یہ بھی اعتراض ہے کہ سہیل آفریدی خیبرپختونخوا حکومت اور صوبائی کابینہ کے فیصلے کے بغیر کیسے درخواست دائر کرسکتے ہیں؟ یہ اعتراض نہیں بنتا کیونکہ ابھی تو کابینہ بنی ہی نہیں ہے۔
عدالت نے رجسٹرار آفس کے اعتراضات دور کرتے ہوئے سیکرٹری داخلہ، سیکرٹری محکمہ داخلہ پنجاب، آئی جی پولیس اور سپریٹنڈنٹ اڈیالہ جیل کو 23اکتوبر کیلئے نوٹس جاری کر دیئے۔
