اسلام آباد: سپیکر قومی اسمبلی سردار ایاز صادق نے پارلیمنٹ ہاؤس کے ملازمین کے سیاسی سرگرمیوں میں ملوث ہونے کا نوٹس لیتے ہوئے حتمی وارننگ جاری کردی۔ تفصیلات کے مطابق سپیکر قومی اسمبلی سردار ایاز صادق نے پارلیمنٹ ہاؤس کے ملازمین کے سیاسی سرگرمیوں میں ملوث ہونے کا نوٹس لیتے ہوئے ڈپٹی سارجنٹ ایٹ آرمز سجاد احمد خان کو شوکاز نوٹس اور چارج شیٹ جبکہ دیگر 4ملازمین کو حتمی وارننگ جاری کردی۔
ذرائع کے مطابق سجاد احمد خان نے پی ٹی آئی دھرنے میں اپنے علاقے کے لوگوں کو بٹھایا تھا، ان کی ڈیوٹی اپوزیشن لیڈر عمر ایوب کے چیمبر میں تھی، منع کرنے کے باوجود وہ علاقے کے لوگوں کو دھرنے میں لاتے رہے جبکہ دیگر چار ملازمین کی ڈیوٹی سابق سپیکر اسد قیصر کیساتھ تھی، چاروں ملازمین قومی اسمبلی کے ملازم ہوتے ہوئے خود دھرنے میں شامل رہے۔ترجمان قومی اسمبلی کے مطابق چاروں ملازمین کو حتمی وارننگ نوٹس جاری کیا گیا ہے۔
