چیئرمین پیپلز پارٹی بلاول بھٹو نے ماحولیاتی تبدیلی، تنازعات و معاشی عدم مساوات کو غربت میں اضافے کی وجوہات قرار دیتے ہوئے کہا ہے کہ عالمی برادری کو منصفانہ، مساوی و پائیدار عالمی نظام کی تشکیل کیلئے مشترکہ اقدامات کرنا ہوں گے۔
غربت کے خاتمے کے عالمی دن پر جاری سوشل میڈیا بیان میں بلاول بھٹو نے کہا کہ قائد عوام اور شہید بی بی نے عوام کے حقوق کی جدوجہد میں زندگیاں وقف کردیں، بینظیر انکم سپورٹ پروگرام غربت کے خلاف سب سے موثر اور شفاف سماجی تحفظ کا نظام ہے۔
انہوں نے کہا کہ بینظیر انکم سپورٹ پروگرام خواتین کو بااختیار بناتا اور خاندانوں کو سہارا دیتا ہے، یہ پروگرام نسل در نسل چلتی خاندانوں کی غربت کے چکر کو توڑ سکتا ہے۔
انہوں نے کہا کہ عالمی برادری کو ان مسائل کو دیکھنا ہوگا جو لاکھوں انسانوں کو مایوسی کی طرف دھکیل رہے ہیں، یہ وقت عالمی سطح پر جغرافیائی تقسیم سے بالاتر ہو کر انسانی بنیادوں پر مشترکہ اقدامات کرنے کا ہے، دنیا کو مشترکہ اقدام کرنا ہوں گے تاکہ ایک منصفانہ، مساوی اور پائیدار عالمی نظام تشکیل دیا جاسکے۔
انہوں نے کہا کہ روٹی، کپڑا اور مکان کے تحت پیپلز پارٹی غربت، عدم مساوات ،سماجی ناانصافی کے خاتمے کیلئے اپنی جدوجہد کو جاری رکھے گی۔
