اسلام آباد: بانی پی ٹی آئی کی ہمشیرہ علیمہ خان نے کہا ہے کہ عمران خان کا پیغام ہے 8ستمبر کا جلسہ کسی صورت ملتوی نہیں ہوگا، جلسہ منسوخی کی اطلاع آئے تو نہیں ماننا، عوام چوری شدہ مینڈیٹ کی واپسی کیلئے گھروں سے ضرور نکلیں۔
تفصیلات کے مطابق اڈیالہ جیل کے باہر میڈیا سے گفتگو کرتے ہوئے بانی پی ٹی آئی کی ہمشیرہ علیمہ خان نے کہا کہ بانی پی ٹی آئی نے کہا ہے کہ گزشتہ روز کا جلسہ اس لئے مؤخر کیا گیا کیونکہ انہیں بتایا گیا تھا کہ مذہبی جماعتیں اسلام آباد میں اکٹھی ہو رہی ہیں،انتشار کا خدشہ ہے۔
انہوں نے کہا کہ بانی پی ٹی آئی نے اعظم سواتی اور بیرسٹر گوہر کو کہا ہے کہ 8 ستمبر والا جلسہ کسی صورت ملتوی نہیں ہو گا۔انہوں نے ورکرز کو ہدایات دی ہیں کہ اگر اب جلسہ منسوخ کرنے کی اطلاع آئے تو آپ نے نہیں ماننا، عوام چوری شدہ مینڈیٹ کی واپسی کیلئے ضرور گھروں سے نکلیں۔
انہوں نے کہا کہ کسی کو سمجھ نہیں آرہی 7 بجے ملاقات کیسے ہوئی ہو گی، جیل میں اسٹیبلشمنٹ کے بغیر کچھ نہیں ممکن، صبح 7 بجے جیل میں ملاقات ہونا ہمارے لئے بھی عجیب بات تھی۔انہوں نے کہا کہ بانی پی ٹی آئی کو اعظم سواتی نے مذہبی جماعتوں کے احتجاج کا بتایا یا ان کو پہلے پتہ تھا دونوں چیزیں ممکن ہیں، گزشتہ روزکی آڈیو میری ہی تھی، ہم سب حیران تھے اچانک کیسے جلسہ ملتوی ہو گیا؟۔
